काठमाडौं (हाम्रो खेलकुद) – लुम्बिनी अल स्टार्सले नेपाल टि२० लिगमा काठमाडौं नाइट्सलाई ३५ रनले हराउँदै लगातार पाँचौं जित हात पारेको छ । लगातार पाँच जितसँगै लुम्बिनी प्लेअफ नजिक पुगेको छ ।

जितको लागि १ सय ५१ रनको विजयी लक्ष्य पछ्याएको नाइट्सले २० ओभरमा ८ विकेट गुमाउँदै १ सय १५ रन बनायो । एक समय ५–४ को दयनीय अवस्थामा पुगेको नाइट्सको लागि आजमतुल्लाह ओमरजाईले २९ बलमा ३ छक्कासहित सर्वाधिक ३८ रन बनाए ।

साड्ली भान स्केलक्किकको बलमा लङअनमा दीपेन्द्रको उत्कृष्ट फिल्डिङको सहयोगमा अनिल शाहले क्याच लिए । क्याच लिएपनि बाउन्ड्री बाहिर जानु परेपछि उनले बल बाहिर फ्याँलेपछि अनिल शाहले क्याच लिएका थिए । २२–५ को अवस्थाबाट एलेक्स ब्लेक र ओमरजाईले ४९ रनको साझेदारी गरेका थिए । एलेक्स ब्लेक हरम्रीत सिंहको बलमा लाहिरु मिलान्थाबाट स्टम्पिङ आउट भएपछि जितको झिनो आशा टाढिएको थियो ।

कप्तान ज्ञानेन्द्र मल्लसहित शीर्षक्रमका तीन खेलाडी खाता नखोली आउट भएपछि यस प्रतियोगिताकै खराब सुरुवात गर्न पुगेको थियो । तेस्रो बलमै ओपनर लोकेश बम रन शून्यमा रन आउट भए । दोस्रो ओभरको तेस्रो बलमा विरनदीप सिंहलाई हरम्रीत सिंहले शून्यमा एलबीडब्लू आउट गरे । विरनदीपले ६ बल खेलेका थिए ।

ज्ञानेन्द्र मल्ल एक बलपछि अनिल कुमार शाहबाट शून्यमै क्याच आउट भए । किशोर महतोले तेस्रो ओभरको पाँचौं बलमा रयान बर्ललाई दुई रनमा बोल्ड गरेपछि ५–४ को दयनीय अवस्थामा पुगेको हो ।

तल्लोक्रमका बसिर अहमद १०, कमलसिंह ऐरीले १९ र अभिनाश बोहराले ८ रन बनाए । अल स्टार्सका हरम्रीत सिंहले ४ ओभरमा १ मेडनसहित ७ रन खर्चेर ३ विकेट लिए । हरम्रीत सिंह २०१२ का यू१९ विश्वकप विजेता भारतीय स्पिनर समेत हुन् । किशोर महतो, तिलकराज भण्डारी, साड्ली भान स्केलक्किक र ह्यारी टेक्टरले एक एक विकेट लिए ।

त्यसअघि टियु क्रिकेट मैदानमा टस जितेर पहिला ब्याटिङ थालेको लुम्बिनीले निर्धारित २० ओभरमा ८ विकेट गुमाउँदै १ सय ५० रन बनायो । लुम्बिनीका कप्तान दीपेन्द्रसिंह ऐरीले २७ बलमा ३ चौका र १ छक्कासहित सर्वाधिक ४० रन बनाए ।

लुम्बिनीका अन्य ब्याटरले भने राम्रो गर्न सकेनन् । ठूलो अपेक्षा गरेका आयरल्यान्डका स्टार ब्याटर ह्यारी टेक्टर पहिलो खेलमा आज १३ बल खेल्दै ७ रनमा आउट भए । टेक्टर एलेक्स ब्लेकको बलमा रयान बर्लले लङअफमा लामो दौडका साथ उत्कृष्ट क्याच लिए ।

ओपनर लाहिरु मिलान्था १८ बलमा २ छक्कासहित २५ रनमा सुनाम गौतमको बलमा बोल्ड भए । अर्का ओपनर सुनिल धमला आजमतुल्लाह ओमरजाईको बलमा ३ रनमा बोल्ड भएका थिए । कुशल भुर्तेल अनिल खरेलको बलमा १९ रनमा एलबीडब्लू आउट भए । भुर्तेलले १६ बलमा ३ चौका हाने ।

हरम्रीत सिंह १२, अनिल शाह १३ र गुलशन झा २ रनमा आउट भए । साड्ली भान स्लेक्किक १५ बलमा १ चौका र १ छक्कासहित २१ रनमा अविजित रहे ।

काठमाडौंका आजमतुल्लाह ओमरजाईले ४ ओभरमा १२ रन खर्चेर २ विकेट लिए । अभिनाश बोहरा, अनिल खरेल, बसिर अहमद, सुनाम गौतम र एलेक्स ब्लेकले एक एक विकेट लिए ।

लुम्बिनी ५ खेलमा १० अंकका साथ शीर्ष स्थानमा छ । अल स्टार्सको प्लेअफ सम्भावना मजबुत बनेको छ । लुम्बिनीले छैटौं खेल शनिबार पोखरा एभेन्जर्ससँग खेल्नेछ । काठमाडौंको भने यो दोस्रो हार हो । काठमाडौं ४ खेलमा २ मा जित र २ मा हारसहित ४ अंकका साथ तेस्रो स्थानमा छ । काठमाडौंले आइतबार जनकपुर रोयल्ससँग खेल्नेछ ।