काठमाडौं (हाम्रो खेलकुद) – लुम्बिनी अल स्टार्सले नेपाल टि२० लिगमा पोखरा एभेन्जर्सलाई १ सय २८ रनको मध्यय लक्ष्य दिएको छ । टियु किकेट मैदानमा टस जितेर पहिला ब्याटिङ थालेको लुम्बिनी १९.५ ओभरमा १ सय २७ रनमा अल आउट भए ।

लुम्बिनीको शीर्षक्रम स्पिनर विपिन खत्रीले धरासयी बनाएका थिए । मध्यक्रम जाहिर खानले धरासयी बनाए । ९ मध्य ८ विकेट पोखरा स्पिनरले लिए । पाँचौं ओभरको तेस्रो बलमा विपिन खत्रीले ओपनर सुनिल धमलालाई १५ रनमा कट एण्ड बोल्ड आउट गरे । धमलाले १४ बलमा १ चौका र १ छक्का हाने । विकेटकिपर कुशल भुर्तेललाई विपिन खत्रीले गोल्डेन डक पेभेलिएन फर्काए ।

हरम्रीत सिंह भने जाहिर खानको बलमा एलबीडब्लू आउट गरे । विपिन खत्रीले अल स्टार्सका प्रमुख ब्याटर ह्यारी टेक्टरलाई १० रनमा क्याच आउट गराएपछि अल स्टार्स ६६–४ को कमजोर अवस्थामा पुगेको थियो । सिद्धान्त लोहनीले दीपेन्द्रसिंह ऐरीलाई १० रनमा आसिफ शेखबाट क्याच आउट भए ।

प्रमुख ब्याटर तथा ओपनर लाहिरु मिलान्था घाइते हुँदा आजको खेलमा टोलीमा छैनन् । तल्लोक्रमका ब्याटरको पनि प्रदर्शन राम्रो हुन सकेन । योगेन्द्रसिंह कार्की १३, साड्ली भान स्केलक्किक १६, गुलशन झा २, प्याट ब्राउन ७ र किशोर महतो ४ रनमा आउट भए ।

पोखराका स्पिनर विपिन खत्री ४ ओभरमा २३ रन खर्चेर ३ विकेट लिए । स्पिनर जाहिर खानले ४ ओभरमा १८ रन खर्चेर ३ विकेट लिए । आरिफ शेख, तुलबहादुर थापा र सिद्धान्त लोहनीले एक एक विकेट लिए ।

लुम्बिनी पाँच खेलमा १० अंकका साथ शीर्ष स्थानमा छ । जारी प्रतियोगिता एकमात्रै अपराजित टोली हो । पोखरा ६ खेलमा १ मा जित र ५ मा हारसहित पुछारमा छ ।