काठमाडौं (हाम्रो खेलकुद) – समिउल्लाह शिनवारीको उत्कृष्ट अलराउन्ड प्रदर्शनमा जनकपुर रोयल्सले नेपाल टि२० लिगमा विराटनगर सुपर किंग्समाथि ४९ रनको सहज जित हात पारेको छ । चौथो जितका साथ जनकपुर रोयल्सले प्लेअफ सम्भावना मजबुत बनाएको छ ।

जितको लागि १ सय ९० रनको विजयी लक्ष्य पछ्याएको विराटनगरले निर्धारित २० ओभरमा ७ विकेट गुमाउँदै १ सय ४० रन बनायो । विराटनगरका हुसेन तालतले २० बलमा ४ चौका र २ छक्कासहित सर्वाधिक ४२ रन बनाए । अन्य कुनैपनि ब्याटरले राम्रो प्रदर्शन गर्न सकेनन् । प्रदीप ऐरी २६ बलमा २ चौका र ३ छक्कासहित ३६ रनमा अविजित रहे ।

ओपनर गौरान्शु शर्मा ३६ बलमा ३ चौकासहित ३३ र आन्द्रे म्याकार्थी २३ बलमा १४ रनमा आउट भए । कप्तान रोहित पौडेल एक रनमा आउट भए । पृथु बास्कोटा २ र विवेक यादव ३ रनमा आउट भए ।

समिउल्लाह शिनवारीले ४ ओभरमा ४ ओभरमा २१ रन खर्चेर ३ विकेट लिए । ललित नारायण राजवंशीले ४ ओभरमा १ मेडनसहित २६ रन खर्चेर २ विकेट लिए ।

त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको जनकपुरले निर्धारित २० ओभरमा ५ विकेट गुमाउँदै १ सय ८९ रन बनायो । जनकपुरका समिउल्लाह शिनवारी ४० बलमा ६ चौका र ६ छक्कासहित सर्वाधिक ७८ रनमा अविजित रहे । खडक बोहरा १२ बलमा १ छक्कासहित १५ रनमा अविजित रहे ।

विष्फोटक ब्याटिङ गर्नेक्रममा अन्तिम ९ बलमा ५ छक्का र एक चौकासहित कुल ३७ रन जोडेको थियो । अन्तिम ओभरमा सन्जिब कुमारस्वामीले तीन छक्का र एक चौकासहित कुल २४ रन खर्चेका थिए । कप्तान ट्रेभन ग्रिफिकले १४ बलमा ४ चौकासहित १९ रनमा आउट भए ।

पवन सरार्फ ६ बलमा २ रनमा आउट भए । चाडविक पाल्टन २२ बलमा ३ चौका र १ छक्कासहित २९ रनमा आउट भए । सन्दीप जोरा १८ बलमा ४ चौकासहित २० रनमा आउट भए । सन्दीप र वाल्टन दुबै सूर्यको बलमा एलबीडब्लू धरापमा परे । विराटनगरका हुसेन तालतले ४ ओभरमा ३३ रन खर्चेर २ विकेट लिए ।

जनकपुर ५ खेलमा ४ मा जित र १ मा हारसहित ८ अंकका साथ दोस्रो स्थानमा छ । लुम्बिनी ६ खेलमा ५ मा जित र १ मा हारसहित १० अंकका साथ शीर्षस्थानमा छ । जनकपुरले आइतकार काठाडौं नाइट्ससँग खेल्नेछ । काठमाडौं ४ खेलमा २ मा जित र २ मा हारसहित ४ अंकका साथ तेस्रो स्थानमा छ ।

विराटनगर ५ खेलमा २ मा जित र ३ मा हारसहित चौथो स्थानमा छ । विराटनलरले आइतबार लुम्बिनी अल स्टार्ससँग खेल्नेछ । पोखरा ७ खेलमा २ मा जित र ५ हारसहित पाँचौं स्थानमा छ । फार वेस्ट युनाइटेड ५ खेलमा १ मा जित र ४ मा हारसहित पुछारमा छ । डबल राउन्ड रोविनको आधारमा हुने प्रतियोगितामा एक टोलीले कुल १० खेल खेल्नेछन् । शीर्ष चारमा पुग्ने टोली प्लेअफमा पुग्नेछन् ।