एजेन्सी – भारतीय क्रिकेट टोलीका बायाँ हाते ओपनर ईशान किशन ओडिआई खेलमा दोहोरो शतकपछि अर्को खेलमा मौका नपाउने पहिलो खेलाडी बनेका छन् । भारतले श्रीलंकाविरुद्ध पहिलो ओडिआई खेलमा गुवाहाटीमा मंगलबारविरुद्ध खेल्दा ईशान किशनलाई बेन्चमा राख्यो ।

ओडिआई इतिहासमा सर्वाधिक रनपछि अर्को खेल गुमाउने उनी पहिलो खेलाडी हुन् । किशनले मंसिर अन्तिममा बंगलादेशविरुद्ध तेस्रो ओडिआई खेलमा १ सय ३१ बलमा २४ चौका र १० छक्कासहित २ सय १० रनको विष्फोटक दोहोरो शतकीय इनिङ खेलेका थिए ।

जुन सर्वाधिक छिटो दोहोरो शतकको कीर्तिमान थियो । किशनले १ सय २६ बलमा दोहोरो शतक हानेका थिए । ईशान किशनले वेस्टइन्डिजका विष्फोटक ब्याटर क्रिस गेलको २०१५ मा जिम्बावेविरुद्ध १ सय ३८ बलमा हानेको दोहोरो शतकको कीर्तिमान तोडेका थिए ।

तर तीनै किशन श्रीलंकाविरुद्ध पहिलो ओडिआईमा बेन्चमा बस्नु पर्यो । भारतले ओपनरमा रोहित शर्मा र शुभमन गिललाई मैदान उतारेको थियो । बंगलादेशविरुद्ध रोहित शर्मा घाइते भएपछि मौका पाएका थिए । ईशान ओडिआईमा दोहोरो शतक हान्ने विश्वकै सातौं खेलाडी हुन् । दोहोरो शतकपछि अर्को खेलमा बेन्चमा बस्ने पहिलो खेलाडी पनि बनेका छन् ।

ईशान किशनअघि ओडिआईमा सर्वाधिक रन बनाएर पनि अर्को खेलमा बेन्चमा बस्ने अष्ट्रेलिया पूर्व ब्याटर ब्राड हज थिए । ब्राड हजले २००७ मा नेदरल्यान्ड्सविरुद्ध १ सय २३ रनको शतकीय इनिङपछि अर्को खेलमा मौका पाएका थिएनन् ।

त्यस्तै श्रीलंकाविरुद्ध तेस्रो टि२० आई खेलमा ५१ बलमा ७ चौका र ९ छक्कासहित १ सय १२ रनको विष्फोटक शतकीय इनिङ खेल्ने सूर्यकुमार यादव पनि पहिलो ओडिआई खेलमा बेन्चमा छन् ।

यो पनि : कोहलीको शतकमा भारतको विशाल योगफल