एजेन्सी – अनुभवी खेलाडी विराट कोहलीको सानदार शतकमा भारतले तेस्रो तथा अन्तिम ओडिआई खेलमा श्रीलंकालाई ३ सय ९१ रनको विशाल विजयी लक्ष्य दिएको छ । ग्रीनफिल्ड अन्तर्राष्ट्रिय स्टेडियममा टस जितेर पहिला ब्याटिङ थालेको भारतले निर्धारित ५० ओभरमा ५ विकेट गुमाउँदै ३ सय ९० रन बनायो ।

भारतका विराट कोहलीले १ सय १० बलमा १३ चौका र ८ छक्कासहित १ सय ६६ रनको सानदार शतकीय इनिङ खेले । कोहलीको यो ओडिआई करिअरको ४६ औं शतक हो । कोहलीले ८५ बलमा शतक पूरा गरेका थिए । शतकपछि कोहली झनै विष्फोटक बने ।

युवा ओपनर शुभमन गिलले ९७ बलमा १४ चौका र २ छक्कासहित १ सय १६ रनको शतकीय इनिङ खेले । गिलको यो ओडिआई करिअरको दोस्रो शतक हो । दोस्रो विकेटका लागि गिल र विराटले १ सय ३१ रनको शतकीय साझेदारी गरेका थिए । तेस्रो विकेटका लागि कोहलीले श्रेयस ऐरसँग १ सय ८ रनको शतकीय साझेदारी गरेका थिए । श्रेयस ऐर ३८ र रोहित शर्मा ४२ रनमा आउट भए ।

श्रीलंकाका लाहिरु कुमाराले १० ओभरमा १ मेडनसहित ८७ रन खर्चेर २ विकेट लिए । कसुन रजिथाले १० ओभरमा १ मेडनसहित ८१ रन खर्चेर २ विकेट लिए । तीन ओडिआई खेलको सिरिज भारतले २–० ले एक खेल अगावै जितेको छ ।