काठमाडौं (हाम्रो खेलकुद) – नेपाली क्रिकेट टोलीको नयाँ मुख्य प्रशिक्षकको रुपमा भारतीय मोन्टी देशाईलाई पाउने भएको छ । नेपाल क्रिकेट संघ (क्यान) ले विश्व क्रिकेटका उत्कृष्ट ब्याटिङ प्रशिक्षक मानिने मोन्टी देशाईलाई नेपालको मुख्य प्रशिक्षकमा ल्याएको छ ।

नेपाली क्रिकेट टोलीका नयाँ मुख्य प्रशिक्षक मोन्टी देशाई शनिबार नेपाल आइपुगेका छन् । तर राष्ट्रिय खेलकुद परिषद् (राखेप) ले नियुक्तिको लागि अनुमति नदिँदा क्यानले हालसम्म औपचारिक रुपमा सार्वजनिक भने गर्न सकेको छैन ।

क्यानले पाँच जना सर्टलिष्टबाट मोन्टीलाई नियुक्त गर्ने निर्णय लिएको हो । अघिल्लो महिना भारतीय प्रशिक्षक मनोज प्रभाकरलाई हटाएपछि रिक्त रहेको पदमा क्यानले खुल्ला आवेदन मागेको थियो ।

कुल २४ जनाले आवेदन दिँदा पाँच जनाको नाम सर्टलिष्टमा परेको थियो । क्यानले सर्ट लिष्टमा परेका भारतीय मोन्टी देशाई, पूर्व मुख्य प्रशिक्षक डेभ ह्वाटमोर, श्रीलंका तीव्र गतिका बलर धाम्मिका प्रसाद, दक्षिण अफ्रिकी रसेल क्रेग डोमिंगो र न्युजिल्यान्ड टी–२० टोलीका पूर्वप्रमुख प्रशिक्षक ग्लेन पोकनलसँग बुधबार अन्तरवार्ता लिएको थियो ।

ब्याटिङमा लगातार खराब प्रदर्शन गरेपछि नेपालले आइपिएलदेखि टेस्ट टोलीसम्म निकै राम्रो अनुभव बोकेका मोन्टीलाई ल्याउने निर्णय लिएको हो । नेपालले यसअघि लगातार मोन्टी देशाई ल्याउन खोजेपनि उनको कार्य व्यस्तताका कारण अन्तिम समयमा सफल हुन सकेको थिएन । मोन्टीको प्रशिक्षणमा नेपाली यू-१९ टोलीले भारतलाई हराउँदै इतिहास रचिसकेको छ ।

डेभ ह्वाटमोर र पुबुदु दासानायकेलाई नियुक्त गर्नुअघि नेपालको प्राथमिकतामा मोन्टी नै थिए । तर मोन्टीले इन्डियन प्रिमियर लिग (आइपिएल) हेर्न बढी समय मागेपछि क्यानले अन्यलाई नियुक्त गरेको थियो । डेढ वर्षको अन्तरमा तीन विदेशी प्रशिक्षक परिवर्तन पछि देशाईलाई नियुक्त गरेको हो ।

मोन्टीलाई ल्याउँदा नेपालको ब्याटिङमा सुधार, अन्तर्राष्ट्रिय स्तरमा प्रदर्शनमा फरक, भाषामा समस्या नहुने र भारतीय घरेलु क्रिकेटको धेरै फाइदा उठाउन सक्ने अनुमान गरिएको छ ।

२०२२ डिसेम्बर अन्तिमसँगै मोन्टीले वेस्टइन्डिज ब्याटिङ प्रशिक्षकको रुपमा तीन वर्ष यात्रा सकाएका थिए । खराब ब्याटिङ समाधानको लागि उनी राम्रा विकल्प हुन् । विशेषगरि उनी युवा प्रतिभा पहिचान र ब्याटिङमा सुधारका लागि चिनिन्छन् ।

मोन्टीले वेस्टइन्डिज, नेपाल, अफगानिस्तान, युएई, क्यानडा, आइपिएलमा गुजरात लायन्यस, राजस्थान रोयल्स, पन्जाब किंग्स, भारतीय घरेलु क्रिकेटमा आन्द्र प्रदेशको प्रशिक्षकको रुपमा काम गरि सकेका छन् । नेपाली क्रिकेटलाई धेरै नजिकबाट हेर्दै आएका आएका छन् ।

नेपालको ऐतिहासिक जितका पर्दा पछाडिका हिरो

सन् २०१७ मा नेपालले एसिसी यू-१९ एसिया कपमा भारतलाई १९ रनले हराउँदै इतिहास रचेको थियो । जुन क्रिकेट इतिहासमा नेपालले भारतलाई हराएको पहिलो खेल थियो । नेपालले भारतलाई हराउँदा मोन्टी नेपालका ब्याटिङ सल्लाहकार थिए । नेपाली यू-१९ टोलीले खराब प्रदर्शन गरेपछि मोन्टीलाई ब्याटिङ सल्लाहकारको रुपमा ल्याएको थियो । नेपालले त्यो प्रतियोगितामा सानदार प्रदर्शन पनि गर्यो ।

मोन्टीले नै यू-१९ मा प्रशिक्षण दिएका त्यस बेलाका दीपेन्द्रसिंह ऐरी, आसिफ शेख र रोहित पोडैल अहिले सिनियर टोलीका प्रमुख ब्याटर हुन् । उक्त टोलीका अनिल शाह, भीम सार्की, पवन सरार्फ, कमलसिंह ऐरी, किशोर महतो, साहब आलम लगायत धेरै खेलाडी अहिले सिनियर टोलीमा छन् ।

नेपालले २०१४ मा बंगलादेशमा भएको आइसिसी टि२० विश्वकप पहिलो पटक खेल्दा उनी टोलीमै थिए । २०१५ मा आयरल्यान्ड र स्कटल्यान्डमा भएको विश्व ट्वान्टी–२० छनोटमा देशाई नेपाली टोलीसँग रहेका थिए । पछिल्लो एक दशकदेखि उनले नेपाली खेलाडीलाई निकै नजिकबाट हेरेका छन् ।

मोन्टीको प्रशिक्षण अनुभव

मोन्टीले २०१९ देखि २०२२ डिसेम्बर सम्म वेस्टइन्डिजको ब्याटिङ प्रशिक्षकको रुपमा काम गरे । मोन्टीको प्रक्षिशकमा युवा ब्याटर निकोलस पुरन र शिम्रन हेटमायरले सानदार प्रदर्शन गरे । त्यस्तै डेब्यू टेस्टमै दोहोरो शतक हान्ने काइल मेयर्स पनि मोन्टीको प्रशिक्षणबाट निखारिएका हुन् । उनको प्रशिक्षणमा विशेषगरि टेस्टमा वेस्टइन्डिजले थुप्रै ब्याटर पाएको छ ।

पछिल्लो समय वेस्टइन्डिजको अन्तर्राष्ट्रिय प्रदर्शन त्यति राम्रो छैन । त्यो प्रशिक्षण भन्दा पनि आन्तरिक राजनीतिको कारण बताइन्छ । मोन्टी २०१९ मा वेस्टइन्डिज जानुअघि युएईको ब्याटिङ प्रशिक्षक थिए । टि२० विश्वकप छनोटपछि भने उनी युएई छाडेर वेस्टइन्डिज गएका थिए । मोन्टी २०१८ देखि २०१९ जुलाई सम्म क्यानडाको मुख्य प्रशिक्षक थिए ।

२०१८ को एकदिवसीय विश्वकप छनोटमा मोन्टी नै अफगानिस्तका ब्याटिङ प्रशिक्षक थिए । अफगानिस्तानले फाइनलमा वेस्टइन्डिजलाई हराउँदै उपाधि जितेको थियो । मोन्टीले २०१६ र २०१७ को आइपिएलमा गुजरात लायन्सको टोली पर्फर्मेन्स कोचको रुपमा हेरेका थिए । मोन्टीले २००८ देखि २०१५ सम्म आइपिएलमा राजस्थान रोयल्सको साहयक प्रशिक्षकको रुपमा काम गरेका थिए । राजस्थानले २००८ को पहिलो संस्करणमै उपाधि जितेको थियो ।

मोन्टी यसअघि नै नेपालमा काम गर्न चाहन्थे । उनी पहिलादेखिनै नेपाली क्रिकेटलाई आफूले केहि गर्न चाहेको र अन्य देशमा भन्दा कम सेवा सुविधामा काम गर्न तयार भएको समेत बताएका थिए । तर क्यान आइसिसीको निलम्बनमा हुँदा त्यो सम्भव हुन सकेन । क्यान आएपछि नेपालले लगातार प्रस्ताव गरेपनि आइपिएलको कार्य व्यस्तताका कारण उनी आएनन् ।

मोन्टीको प्रशिक्षणमा नेपालले पहिलो अन्तर्राष्ट्रिय खेल अर्को महिना आइसिसी विश्वकप लिग-२ त्रिकोणात्मक ओडिआई सिरिजमा घरेलु मैदान टियुमा नामिबिया र स्कटल्यान्डसँग खेल्नेछ । नेपालले पहिलो खेल फागुन २ (फेब्रुअरी १४) मा नामिबियासँग खेल्नेछ ।

दोस्रो खेल फागुन ५ (फेब्रुअरी १७) मा स्कटल्यान्डसँग खेल्नेछ । नेपालले फागुन ६ (फेब्रुअरी १८) मा नामिबियासँग खेल्नेछ । नेपालले यस सिरिजको अन्तिम खेल फागुन ९(फेब्रअरी २१) मा स्कटल्यान्डसँग खेल्नेछ । नेपालले २८ सदस्य टोली बन्द प्रशिक्षणमा बोलाएको छ । मोन्टीले त्यसबाट अन्तिम टोली घोषणा गर्नेछन् ।

नेपाल २४ खेलमा ८ मा जितसहित १८ अंक जोड्दै छैटौं स्थानमा छ । नेपालले अब विश्वकप लिग २ मा १२ खेल खेल्न बाँकी छ । शीर्ष पाँचमा पर्दै ओडिआई मान्यता जोगाउन कम्तिमा ९ खेल जित्नु पर्ने हुन्छ ।