काठमाडौं (हाम्रो खेलकुद) – नेपाल क्रिकेट संघ (क्यान) का ७ केन्द्रीय सदस्यले नेपाल टि२० लिगमा भएका विविध गल्तीको जिम्मेवारी नेतृत्वले लिनुपर्ने बताउँदै अध्यक्षसहित कार्यसम्पादन समितिको राजीनामा माग गरेका छन् ।
क्यानको केन्द्रीय समितिमा रहेका ७ सदस्यले पटक पटक सचेत गराउनुका बाबजुद कार्यसमितिलाई गुमराहमा राख्दै विवादित संस्थालाई जिम्मेवारी दिएको खुलासा गरे । क्यान नेतृत्वको कार्यप्रति असन्तुष्ट रहेको समूहले विना कुनै जानकारी विवादित सम्झौता पटक पटक संशोधन गरेपनि कार्यसमितिलाई कुनै जानकारी नदिएको दावी गरे ।
केन्द्रीय सदस्यहरु ऋषिराम गौतम, दाउद अन्सारी, संजयराज सिंह, करण महतरा क्षेत्री, अमितवीर पाण्डे, छुम्बी लामा र धर्मराज गिरीले पत्रकार सम्मेलन गर्दै धारणा सार्वजनिक गरेका हुन् ।
क्यानको कार्यसम्पादन समितिमा अध्यक्ष चतुरबहादुर चन्द, कार्यवाहक सचिव प्रशान्तविक्रम मल्ल, कोषाध्यक्ष रोशनबहादुर सिंह र सदस्यद्वय दुर्गाराज पाठक र पदम खड्का छन् । समितिले कार्यसमिति बैठकमा कुनै जानकारी नदिई पटक पटक क्यानको गतिविधि अघि बढाएको आरोप लगाए । नेपाल टि२० लिगसँगै प्रशिक्षक नियुक्ति, अन्तर्राष्ट्रिय प्रतियोगिताको व्यापारिक अधिकार, घरेलु प्रतियोगिता आयोजना, लगायत विविध विषयमा कार्यसमितिमा कुनै छलफल नहुने पनि बताए ।
असन्तुष्ट समूहले पटक पटक सचेत गराउनका बावजुद त्यहि कम्पनिलाई नेपाली क्रिकेट सुम्पने हठ गर्ने नेतृत्व अहिले आएर माफी मागेको भरमा पन्छिन नमिल्ने जनाएका छन् । क्यान नेतृत्वले विहीबार पत्रकार सम्मेलनमार्फत गल्ती स्विकार गरेको थियो । तर असन्तुष्ट पक्षले उक्त धारणा क्यानको आधिकारिक नभएर नेतृत्व समूहको व्यक्तिगत धारणाको रुपमा लिनुपर्ने बताए ।
नेतृत्व समूहले राजीनामा गरेर नेपाल टी-२० लिगका दौरान भएका गल्तीको छानविन गर्न सम्बन्धित निकायहरुलाई सघाउनुपर्ने माग असन्तुष्ट पक्षको छ । यसबाहेक नेपाल टि२० लिगको गभर्निङ काउन्सिल पनि कारवाहीको दायरामा आउनुपर्ने माग समूहको छ ।
सदस्य छुम्बी लामाले नेतृत्व आफैंले एक समय खराब भनेको संस्थालाई विना जानकारी सम्झौता गर्नु शंकास्पद रहेको बताए । ‘बोर्ड बैठकमा हामीलाई सेभेन थ्री स्पोर्ट्स खराब कम्पनी भनेर कुनै हालतमा सम्झौता नहुने भनियो । हामीले ताली बजाएर त्यसको स्वागत गर्यौं । पछि साधारण सभाबाट पुन: बोर्डलाई जिम्मेवारी दिएपछि त्यसै संस्थासँग सम्झौता गरियो,’ लामाले भने ।
‘हामीले पटक पटक यसबारे सचेत गराएका हौं । तर न हाम्रो कुरा सुनियो, न माग अनुसार सम्झौता हेर्न पाइयो । तीन पटक सम्झौता संशोधन गरिएको भन्ने मिडियाबाट सुनिन्छ, तर हामीलाई केही जानकारी छैन ।’
अर्का सदस्य ऋषिराम गौतमले क्यान निलम्बनबाट बचाउनुपर्ने र नेतृत्वले राजीनामा नदिए आउने दिनमा अरु कदम चाल्ने बताए । ‘हामी क्रिकेट बचाउन आएका हौं । क्यानलाई निलम्बनबाट बचाउनु पर्छ । हस्तक्षेप गर्नुपर्छ भन्ने हाम्रो माग होइन, तर गलत गर्नेलाई कारवाही हुनुपर्छ । वर्तमान मात्र नभएर भविष्यमा पनि यस्ता गल्ती नहोस् भन्न हामी यहाँ आएका हौं,’ गौतमले भने ।
यस्तै नेपाल टी-२० लिगको गभर्निङ काउन्सिलका संयोजक प्रशान्त विक्रम मल्लसँगै सदस्यहरु दुर्गाराज पाठक, भानुभक्त सिग्देल, अशोक मल्होत्रा र सेभेन थ्रीका जतिन अहलुवालिया पनि दोषी भएको समूहको ठम्याइ छ । क्यानका कर्मचारी सिग्देललाई काउन्सिलमा संलग्न गर्नु नै गलत रहेको सदस्य लामाले बताए ।
