एजेन्सी – पाकिस्तानका तीव्र गतिका युवा बलर शाहिन शाह अफ्रिदीले पूर्व कप्तान शाहिद अफ्रिदीको छोरी अन्शासँग विवाह गरेका छन् । शाहिनले शुक्रबार पाकिस्तानको कराँचीमा मुश्लिम पराम्परा अनुसार विवाह गरेका हुन् । शाहिन र अन्शाले दुईवर्ष अघि इन्गेजमेन्ट गरेका थिए ।

शाहिनको विवाहमा पाकिस्तानका कप्तान बाबर आजम, शरफराज अहमद, नसिम शाह र शादब खान लगायतका क्रिकेटर सहभागी थिए । शाहिन पाकिस्तानका वर्तमान समयका प्रमुख खेलाडी हुन् ।

तीन महिनाअघि अष्ट्रेलियामा भएको टि२० विश्वकपमा पाकिस्तानलाई फाइनल सम्म पुर्याउन शाहिनले सानदार प्रदर्शन गरेका थिए । फाइनलको अन्तिम समयमा शाहिन घाइते भएपछि पाकिस्तान इंग्ल्यान्डसँग पराजित हुन पुगेको थियो ।

गतवर्ष टि२० विश्वकपमा भारतलाई १० विकेटले हराउँदा शाहिन ४ ओभरमा ३१ रन खर्चेर ३ विकेट लिदै प्लेयर अफ द म्याच चुनिएका थिए । २२ वर्षीय उनले पाकिस्तानबाट २५ टेस्ट, ३२ ओडिआई र ४७ टि२० आई खेल खेलेका छन् । विश्व क्रिकेटका वर्तमान समयका उत्कृष्ट बलरमा पर्दछन् ।

उता ४२ वर्षीय अलराउन्डर शाहिद अफ्रिदी विश्व क्रिकेटकै एक सफल अलराउन्डर हुन् । उनले पाकिस्तानबाट २७ टेस्ट, ३ सय ९८ ओडिआई र ९९ टि२० आई खेल खेलेका छन् । शाहिद अफ्रिदी वर्तमान समयका पाकिस्तानका प्रमुख छनोटकर्ता समेत हुन् ।