काठमाडौं (हाम्रो खेलकुद) – पाकिस्तानका सुपरस्टार विकेटकिपर ब्याटर मोहम्मद रिजवान नेपाली क्रिकेटर सन्दीप लामिछानेलाई भेट्न नेपाल आएका छन् । बलात्कार आरोप पछि नेपाली टोलीमा फर्किएका सन्दीपलाई भेट्न रिजवान आइतबार नेपाल आएका थिए ।

सन्दीपलाई हौसला प्रदान गर्न रिजवान नेपाल आएको नेपाल क्रिकेट संघ (क्यान) उच्च स्रोतले हाम्रो खेलकुदलाई जानकारी दिएको छ । स्रोतका अनुसार सन्दीपलाई रिजवानले आइतबार नै भेटेर हौसला प्रदान गरेका छन् । सन्दीपलाई हौसला र मनोबल बढाउन नै पाकिस्तानबाट नेपाल आइपुगेको बुझिएको छ ।

क्यान स्रोतका अनुसार सन्दीपलाई भेटेर मनोबल बढाउन पछिल्लो समय विश्वस्टार क्रिकेटरहरुले इच्छा जनाउँदै आएका छन् । भारतीय विकेटकिपर दीनेश कार्तिकले पनि नेपाल आएर सन्दीपलाई भेट्ने इच्छा गरेको बुझिएको छ ।

रिजवानले सोमबार विहान नेपाली क्रिकेट टोलीलाई पनि भेटेर सल्लाह सुझाव दिएका छन् । नेपाली टोलीसँग बैठक गरिरहेका रिजवान आज नै पाकिस्तान फर्किनेछन् ।

गत मंगलबार पोखरामा बसेको बोर्ड बैठकले सन्दीपमाथि लगाएको निलम्बन फुकुवा गरेको थियो । बलात्कार आरोपपछि सन्दीपमाथि मनोबलमा असर परेको हुँदा उनलाई सहयोगन गर्न नै रिजवान नेपाल आएको बुझिएको छ ।

शुक्रबारदेखि सन्दीपले सिनियर टोलीसँग बन्द प्रशिक्षणमा सामेल भएका थिए । एक हप्तापछि घरेलु मैदान टियुमा नेपालले आइसिसी विश्वकप लिग २ त्रिकोणात्मक ओडिआई सिरिज अन्तर्गत स्कटल्यान्ड र नामिबियासँग खेल्दैछ ।

भदौ ५ गते काठमाडौंको एक होटलमा लगेर नाबालिगलाई बलात्कार गरेको आरोप सन्दीपमाथि लागेको थियो । भदौ २१ गते एक नाबालिगले सन्दीपले आफूलाई पटक पटक बलात्कार गरेको भन्दै प्रहरी वृत गौशालामा किटानी जाहेरी दिएकी थिइन ।

सन्दीपलाई पुष २८ मा उच्च अदालत पाटनले काठमाडौं जिल्ला अदालतको आदेश बदर गर्दै २० लाख धरौटीमा रिहा गर्न आदेश दिएको थियो । पाटनले सन्दीपलाई विदेश जाने भने रोक लगाएको छ । तर क्रिकेट खेल्न पाउने वा नपाउने कुनै जानकारी दिएको छैन । बलात्कार आरोप लागेपछि सन्दीप असोज २० मा नेपाल प्रहरी सामू आत्मासमर्पण गरेका थिए । सन्दीप ९९ दिन हिरासतमा बस्नुपरेको थियो ।

रिजवान वर्तमान समयका टि२० क्रिकेटका प्रमुख ब्याटर हुन् । विश्व टि२० आई वरियता दोस्रो स्थाननमा रहेका रिजवानले लगातार उत्कृष्ट प्रदर्शन गर्दै आएका छन् । पाकिस्तानले विश्व क्रिकेटमा लगातार उच्च प्रदर्शन गर्दा रिजवान र बाबर आजम नायक बन्दै आएका छन् । ३० वर्षीय रिजवानले ८० टि२० आई खेलमा १ शतक र २३ अर्धशतकसहित २ हजार ६ सय ३५ रन बनाएका छन् ।

गतवर्ष टि२० विश्वकपमा पाकिस्तानले भारतलाई १० विकेटले हराउँदा रिजवानले ७९ रनको यादगार प्रदर्शन गरेका थिए । रिजवान क्लास, जिम्मेवारी र ठूलो इनिङका लागि चर्चित ब्याटरमा पर्दछन् । रिजवानको विकेट लिन विश्वका जुनसुकै बलरलाई कठिन पर्दै आएको छ । उनको परिपक्क प्रदर्शनमा पाकिस्तानले लगातार उत्कृष्ट प्रदर्शन गर्दै आएको छ ।

रिजवानको क्रिकेट जीवनी पढ्नुहोस् : रिजवान : आइसियुबाट उठेर मैदानमा प्रदर्शन