काठमाडौं (हाम्रो खेलकुद) – एक हप्ता अघिनै नेपाल आएका भारतीय मोन्टी देशाई नेपाली क्रिकेट टोलीको नयाँ मुख्य प्रशिक्षकमा औपचारिक रुपमा नियुक्त भएका छन् । नेपाल क्रिकेट संघ (क्यान) ले विश्व क्रिकेटका उत्कृष्ट ब्याटिङ प्रशिक्षक मानिने मोन्टी देशाईलाई नेपालको मुख्य प्रशिक्षकमा औपचारिक रुपमा सोमबार एक पत्रकार सम्मेलन गर्दै नियुक्त गरेको जानकारी दिएको छ ।

मोन्टी माघ १४ मा नेपाल आइपुगेका थिए । नेपाल आएको अर्कोदिनबाट मोन्टीले नेपालमा प्रशिक्षण सुरु गरेका थिए । मोन्टी नेपाल आएको एक हप्तापछि मात्रै क्यानले औपचारिक रुपमा नियुक्त गरेको हो । राष्ट्रिय खेलकुद परिषद् (राखेप) ले नियुक्तिको लागि अनुमति समयमै नदिँदा ढिलो नियुक्त भएको हो । उनले एक हप्तादेखि नेपाली टोलीलाई प्रशिक्षण दिई रहेका छन् ।

अर्को हप्ता घरेलु मैदान टियुमा हुने आइसिसी विश्वकप लिग-२ त्रिकोणात्मक ओडिआई सिरिज अन्तर्गत नेपालले नामिबिया र स्कटल्यान्डसँग खेल्दैछ । मोन्टीले त्यहिँ सिरिजबाट डेब्यू गर्नेछन् । मोन्टी २०१७ पछि नेपाली क्रिकेट टोलीमा फर्किएका हुन् ।

मोन्टी ब्याटिङ सल्लाहकार हुँदा २०१७ मा नेपालले यू-१९ एसिया कपमा भारतलाई पराजित गरेको थियो । क्रिकेट इतिहासमा नेपालले कुनैपनि खेलमा भारतलाई हराएको त्यो नै पहिलो र एक मात्रै खेल हो । मोन्टी पछिल्लो तीन वर्ष वेस्टइन्डिजमा ब्याटिङ प्रशिक्षकको रुपमा काम गरेका थिए । मोन्टीले डिसेम्बर महिनादेखि वेस्टइन्डिज छाडेका हुन् ।

क्यानले पाँच जना सर्टलिष्टबाट मोन्टीलाई नियुक्त गरेको हो । अघिल्लो महिना भारतीय प्रशिक्षक मनोज प्रभाकरलाई हटाएपछि रिक्त रहेको पदमा क्यानले खुल्ला आवेदन मागेको थियो । कुल २४ जनाले आवेदन दिँदा पाँच जनाको नाम सर्टलिष्टमा परेको थियो ।

क्यानले सर्ट लिष्टमा परेका भारतीय मोन्टी देशाई, पूर्व मुख्य प्रशिक्षक डेभ ह्वाटमोर, श्रीलंका तीव्र गतिका बलर धाम्मिका प्रसाद, दक्षिण अफ्रिकी रसेल क्रेग डोमिंगो र न्युजिल्यान्ड टी–२० टोलीका पूर्वप्रमुख प्रशिक्षक ग्लेन पोकनलसँग अन्तरवार्ता लिएको थियो ।

ब्याटिङमा लगातार खराब प्रदर्शन गरेपछि नेपालले आइपिएलदेखि टेस्ट टोलीसम्म निकै राम्रो अनुभव बोकेका मोन्टीलाई ल्याउने निर्णय लिएको हो । नेपालले यसअघि लगातार मोन्टी देशाई ल्याउन खोजेपनि उनको कार्य व्यस्तताका कारण अन्तिम समयमा सफल हुन सकेको थिएन ।

डेभ ह्वाटमोर, पुबुदु दासानायके र मनोज प्रभाकरलाई नियुक्त गर्नुअघि नेपालको प्राथमिकतामा मोन्टी नै थिए । तर मोन्टीले इन्डियन प्रिमियर लिग (आइपिएल) हेर्न बढी समय मागेपछि क्यानले अन्यलाई नियुक्त गरेको थियो । डेढ वर्षको अन्तरमा तीन विदेशी प्रशिक्षक परिवर्तन पछि देशाईलाई नियुक्त गरेको हो ।

मोन्टीलाई ल्याउँदा नेपालको ब्याटिङमा सुधार, अन्तर्राष्ट्रिय स्तरमा प्रदर्शनमा फरक, भाषामा समस्या नहुने र भारतीय घरेलु क्रिकेटको धेरै फाइदा उठाउन सक्ने अनुमान गरिएको छ । विशेषगरि उनी युवा प्रतिभा पहिचान र ब्याटिङमा सुधारका लागि चिनिन्छन् ।

मोन्टीले वेस्टइन्डिज, नेपाल, अफगानिस्तान, युएई, क्यानडा, आइपिएलमा गुजरात लायन्यस, राजस्थान रोयल्स, पन्जाब किंग्स, भारतीय घरेलु क्रिकेटमा आन्द्र प्रदेशको प्रशिक्षकको रुपमा काम गरि सकेका छन् । नेपाली क्रिकेटलाई धेरै नजिकबाट हेर्दै आएका आएका छन् ।

नेपालले २०१४ मा बंगलादेशमा भएको आइसिसी टि२० विश्वकप पहिलो पटक खेल्दा उनी टोलीमै थिए । २०१५ मा आयरल्यान्ड र स्कटल्यान्डमा भएको विश्व ट्वान्टी–२० छनोटमा देशाई नेपाली टोलीसँग रहेका थिए । पछिल्लो एक दशकदेखि उनले नेपाली खेलाडीलाई निकै नजिकबाट हेरेका छन् ।

मोन्टीको प्रशिक्षण अनुभव

मोन्टीले २०१९ देखि २०२२ डिसेम्बर सम्म वेस्टइन्डिजको ब्याटिङ प्रशिक्षकको रुपमा काम गरेका थिए । मोन्टी २०१९ मा वेस्टइन्डिज जानुअघि युएईको ब्याटिङ प्रशिक्षक थिए । टि२० विश्वकप छनोटपछि भने उनी युएई छाडेर वेस्टइन्डिज गएका थिए । मोन्टी २०१८ देखि २०१९ जुलाई सम्म क्यानडाको मुख्य प्रशिक्षक थिए ।

२०१८ को एकदिवसीय विश्वकप छनोटमा मोन्टी नै अफगानिस्तका ब्याटिङ प्रशिक्षक थिए । अफगानिस्तानले फाइनलमा वेस्टइन्डिजलाई हराउँदै उपाधि जितेको थियो । मोन्टीले २०१६ र २०१७ को आइपिएलमा गुजरात लायन्सको टोली पर्फर्मेन्स कोचको रुपमा हेरेका थिए । मोन्टीले २००८ देखि २०१५ सम्म आइपिएलमा राजस्थान रोयल्सको साहयक प्रशिक्षकको रुपमा काम गरेका थिए । राजस्थानले २००८ को पहिलो संस्करणमै उपाधि जितेको थियो ।

मोन्टी यसअघि नै नेपालमा काम गर्न चाहन्थे । उनी पहिलादेखिनै नेपाली क्रिकेटलाई आफूले केहि गर्न चाहेको र अन्य देशमा भन्दा कम सेवा सुविधामा काम गर्न तयार भएको समेत बताएका थिए । तर क्यान आइसिसीको निलम्बनमा हुँदा त्यो सम्भव हुन सकेन । क्यान आएपछि नेपालले लगातार प्रस्ताव गरेपनि आइपिएलको कार्य व्यस्तताका कारण उनी आएनन् ।

मोन्टीको प्रशिक्षणमा नेपालले पहिलो अन्तर्राष्ट्रिय खेल अर्को महिना आइसिसी विश्वकप लिग-२ त्रिकोणात्मक ओडिआई सिरिजमा घरेलु मैदान टियुमा नामिबिया र स्कटल्यान्डसँग खेल्नेछ । नेपालले पहिलो खेल फागुन २ (फेब्रुअरी १४) मा नामिबियासँग खेल्नेछ ।

दोस्रो खेल फागुन ५ (फेब्रुअरी १७) मा स्कटल्यान्डसँग खेल्नेछ । नेपालले फागुन ६ (फेब्रुअरी १८) मा नामिबियासँग खेल्नेछ । नेपालले यस सिरिजको अन्तिम खेल फागुन ९(फेब्रअरी २१) मा स्कटल्यान्डसँग खेल्नेछ ।

नेपाल २४ खेलमा ८ मा जितसहित १८ अंक जोड्दै छैटौं स्थानमा छ । नेपालले अब विश्वकप लिग २ मा १२ खेल खेल्न बाँकी छ । शीर्ष पाँचमा पर्दै ओडिआई मान्यता जोगाउन कम्तिमा ९ खेल जित्नु पर्ने हुन्छ । नेपालले एक महिना उत्कृष्ट प्रदर्शन गर्दै ओडिआई मान्यतालाइ निरन्तरता दिनुपर्ने हुन्छ । खराब ब्याटिङ सुधार मोन्टीको लागि मुख्य चुनौती हुनेछ ।