काठमाडौं (हाम्रो खेलकुद) – नेपाली क्रिकेट टोलीका कप्तान रोहित पौडेलले मुख्य प्रशिक्षक मोन्टी देशाई आएपछि टोलीको वातावरण एकदमै सकरात्मक रहेको बताएका छन् । बुधबार टियु क्रिकेट मैदानमा अभ्यासको क्रममा रोहितले हाम्रो खेलकुदसँग कुराकानी गर्दै समग्र टोलीको बारे प्रतिक्रिया दिएका छन् ।

‘नयाँ प्रशिक्षक आएदेखि टोलीको एकदमै राम्रो वातावरण भएको छ । टोलीमा सबैजना संलग्न छौं । बलर, ब्याटर र फिल्डर सबै पक्ष सकारात्मक छ’, रोहितले हाम्रो खेलकुदसँग भने ।

नेपालले २०१७ को यू–१९ एसिया कपमा भारतलाई हराउँदा दीपेन्द्र, आसिफ शेख, रोहित, भीम सार्की, कमलसिंह ऐरी, सन्दीप लामिछाने, किशोर महतो लगायतका खेलाडी अहिलेसँगै टोलीमा छन् । मोन्टी त्यो समय नेपाली यू-१९ का ब्याटिङ सल्लाहकार थिए । रोहित मोन्टीको प्रशिक्षण शैलीमा खासै परिवर्तन नभएको बताउँछन् ।

‘प्रशिक्षण शैलीमा मैले खासै परिवर्तन पाएको छैन । सर पहिला जस्तो हुन्थ्यो अहिले पनि त्यस्तै हुनुहुन्छ । २०१७ मा जसरी मनोबल र हौसला बढाउनु हुन्थ्यो अहिले पनि त्यसै गर्नुभएको छ । वहाँले सबैसँग समय लिएर प्रष्ट कुरा बताउनुहुन्छ । टिमको वातावरण सकारात्मक छ । समग्रमा एकदमै राम्रो छ’, रोहितले भने ।

नेपाली खेलाडीमा यसअघिका प्रशिक्षकले पनि क्षमताको कुनै कमी नभएको तर मानसिक रुपमा तयार हुनुपर्ने बताउँदै आएका छन् । यस पटक मोन्टीले टोलीलाई मानसिक रुपमा तयार राख्न बढी जोड दिएका छन् । रोहित मोन्टीको योजना सुन्दा सकरात्मक लागेको बताउँछन् ।

‘सर (मोन्टी) को योजना सुन्दा एकदमै सकरात्मक लाग्यो । क्रिकेट मैदानबाहिर पनि वातावरण एकदमै राम्रो राख्नु भएको छ । कमजोरी मानिएको मानसिक क्षेत्र पनि काम भइरहेको छ’, उनले भने ।

लिग-२ को समीकरण हेर्दा नेपाल कठिन अवस्थामा छ । आइसिसी विश्वकप लिग–२ मा नेपालले बाँकी १२ खेल खेल्न बाँकी छ । ओडिआई मान्यता जोगाउन कम्तिमा ८ भन्दा बढी खेल जित्नुपर्ने हुन्छ । नेपालको ओडिआई मान्यता गुम्न सक्ने खतरा पनिछ । त्यसैको कारण जित नेपालको लागि दबाब छ । अझ नेपाल भन्दा तुलनात्मक रुपमा बलिया नामिबिया र स्कटल्यान्डासँग नेपालले घरेलु मैदानमा खेल्दैछ ।

‘हाम्रो लागि यो एकदमै महत्वपूर्ण सिरिज भएको सबैलाई थाहा भएकै कुरा हो । त्यो कुराले प्रदर्शनमा दबाब आउन भएन । आफ्नो प्रक्रिया पुरा गरेपछि नतिजा आफैं आउँछ । सबै खेलाडीहरुको ध्यान प्रक्रियामानै छ । त्यसै अनुसार जित पनि आउँछ’, रोहितले ओडिआई मान्यताबारे भने ।

रोहित घरेलु मैदानको फाइदा हुने बताए । ‘घरेलु मैदानको फाइदा हुन्छ । यसअघि हामीले घरेलु मैदानमा खेलेको सिरिजमा प्रदर्शन पनि राम्रो छ । यो विकेटको सबै जनाले अनुभव प्रयोग गर्ने हो’, उनले भने ।

रोहितले नेपाली टोलीबाट लगातार राम्रो प्रदर्शन गर्दै आएका छन् । यस सिरिजमा पनि रोहितको प्रदर्शन निकै महत्त्वपूर्ण हुनेछ । ‘मेरो ब्याटबाट रन बन्न निकै महत्त्वपूर्ण छ । मैले जुन भूमिकामा ब्याटिङ गरेको छु त्यहाँबाट राम्रो अवस्थामा पुर्याउन निकै महत्त्वपूर्ण हुन्छ । मैले यो सिरिजमा आफ्नो उत्कृष्ट दिन प्रयास गर्नेछु’, रोहितले भने ।

दीपेन्द्र नेपाली टोलीका महत्वपूर्ण ब्याटर हुन् । तर टि२० आईमा सानदार प्रदर्शन गर्दा ओडिआईमा त्यस विपरित छ । यस सिरिजमा दीपेन्द्रबाट समग्र नेपाली टोलीनै उत्कृष्ट प्रदर्शन चाहन्छ ।

‘दीपेन्द्र दाईको प्रदर्शन एकदमै आवश्यक छ । टि२० आईमा प्रदर्शन गर्नु भएको छ । त्यहिँ प्रदर्शन हामीलाई ओडिआईमा चाहियो । ओडिआईमा पनि हामी फिनिसरको रुपमा हेरेका छौं’, दीपेन्द्रको प्रदर्शनबारे रोहितले भने ।

नेपालले अन्तिम टोली घोषणा गरेको छैन । केहि दिनमा आफ्नो अन्तिम टोली घोषणा गर्नेछ । टियु क्रिकेट मैदानमा २० सदस्य टोलीले अभ्यास गर्दै आएका छन् । नेपालले पहिलो खेल फागुन–२ मा नामिबियासँग खेल्दै सुरुवात गर्नेछ ।https://youtu.be/0CodehZvUKE