एजेन्सी – अष्ट्रेलिया र भारतबीचको पहिलो टेस्ट खेल विहीबार देखि नागपुरमा सुरु हुँदैछ । खेल विहीबार विहान नेपाली समय अनुसार ९ : ४५ मा विदर्भ क्रिकेट एसोसियसन नागपुरमा सुरु हुनेछ ।
घरेलु टोली भारतलाई आइसिसी विश्व टेस्ट च्याम्पियनसिप २०२३ को फाइनल खेल्न चार मध्य तीन खेल जित्नुपर्ने हुन्छ । यता अष्ट्रेलियाको फाइनल लगभग पक्कापक्की छ । भारतसँग चार मध्य एक खेल जित निकाल्दा अष्ट्रेलिया फाइनलमा औपचारिक रुपमा प्रवेश गर्नेछ ।
तर भारत र अष्ट्रेलियाबीच यो सिरिज दुईदेशबीचको प्रतिष्ठाको लडाई हो । विश्वका दुई शक्तिशाली देश उत्कृष्ट प्रदर्शनका साथ सिरिज जित्न चाहन्छन् । भारतलाई जित्नै पर्ने दबाब हुँदा अष्ट्रेलिया स्वतन्त्र रुपमा आफ्नो खेल खेल्नेछ । भारत आफ्नो घरेलु मैदान, समथर्क र वातावरणको फाइदा उठाउने सोचमा छ ।
यस टेस्ट सिरिजलाई भारतको स्पिन र अष्ट्रेलियाको ब्याटिङको लडाईको रुपमा समेत हेरिएको छ । नागपुरमा स्पिनरलाई सहयोग पुग्ने अनुमान गरिएको छ । भारतीय मिडियाका अनुसार पिच टर्न बनाइएको छ । भारतले तीन स्पिनर मैदान उतार्ने उच्च सम्भावना छ । विश्व क्रिकेटमा सानदार ब्याटिङ गर्दै आएका विश्वस्टार ब्याटर अष्ट्रेलिया ब्याटिङको पनि असली परिक्षा हुनेछ ।
अष्ट्रेलिया टोलीमा डेविड वार्नर, उस्मान खवाज, स्टिभ स्मिथ, मार्नस लाबुसेन र ट्रविस हेड जस्ता लयमा भएका स्टार ब्याटर छन् । लाबुसेन विश्व टेस्ट वरियताका नम्बर वान ब्याटर हुन् । दोस्रो नम्बरमा स्टिभ स्मिथ छन् । चौथो नम्बरमा विश्व वरियतामा हेड छन् । आठौं नम्बरमा उस्मान खवाजा छन् ।
लाबुसेनले मात्रै ३३ टेस्ट खेलमा ५९.४३ को औसतमा १० शतक र १४ अर्धशतकसहित ३ हजार १ सय ५० रन बनाएका छन् । लाबुसेनले लगातार मध्यक्रममा भरपर्दो ब्याटिङ गर्दै आएका छन् ।
स्मिथ विश्व टेस्टकै सर्वाधिक सफल ब्याटर मध्यका एक हुन् । स्मिथको विकेट भारतको लागि महत्वपूर्ण हुनेछ । तर स्मिथ उच्च लयमा छन् । बिग ब्यास लिगमा लगातार दुई शतक हानेर आएका स्मिथको मनोबल उच्च छ । अनुभवी टेस्ट स्टार स्मिथ स्पिन बलिङ पनि राम्रो खेल्ने गर्दछन् ।
अष्ट्रेलिया आफ्ना प्रमुख ब्याटर स्मिथबाट ठूलो इनिङ चाहन्छ । उता उस्मान खवाजा र ट्रविस हेडले टेस्टमा लगातार सानदार प्रदर्शन गर्दै आएका छन् । त्यसैले अष्ट्रेलियाको ब्याटिङ युनिट निकै मजबुत छ । विकेटकिपर एलेक्स केरी पनि राम्रो ब्याटिङ गर्ने गर्दछन् । युवा अलराउन्डर क्यामरन ग्रीन, मिचेल स्टार्क र जोश हेजलवुड चोटका कारण पहिलो टेस्ट गुमाउनेछन् । ग्रीन नहुँदा तल्लोक्रम ब्याटिङमा केहि असर पर्नसक्छ ।
विश्वस्तरिय ब्याटिङ आक्रामण भएको अष्ट्रेलियालाई भारतीय मैदानमा स्पिनर खेल्न सहज भने हुनेछैन । पिच टर्न बनाइएको छ । अर्कोतर्फ भारतसँग रविचन्द्रन आश्विन, रविन्द्र जडेजा, कुलदीप यादव र अक्षर पटेल जस्ता विश्वस्तरिय स्पिनर छन् । यी चार मध्य तीनले प्लेइङ ११ मा खेल्ने सम्भावना छ । भारतले तीव्र गतिका बलरमा मोहम्मद शिराज र मोहम्मद शामीलाई मैदान उतार्ने सम्भावना छ । स्पिनरको प्रदर्शन भारतको लागि महत्वपूर्ण हुनेछ ।
भारतको ओपनिङमा रोहित शर्मालाई लोकेश राहुल वा शुभमन गिल मध्य एकले साथ दिनेछन् । पछिल्लो समय न्युजिल्यान्डविरुद्ध ओडिआईमा दोहोरो र टि२० आईमा शतक हानेका गिललाई मौका दिनसक्छ । तेस्रो नम्बरमा चेतेश्वर पुजारा र चौथो नम्बरमा विराट कोहली हुनेछन् ।
पुजारा र कोेहली भारतका प्रमुख ब्याटर हुन् । यी दुई ब्याटरबाट उच्च प्रदर्शन चाहन्छ । कार दुर्घटनाको कारण विकेटकिपर ऋषभ पन्त नहुँदा टोलीलाई असर पर्नेछ । भारतले पाँचौं नम्बरमा सूर्यकुमार यादवलाई डेब्यू दिनसक्छ । विकेटकिपरमा केएस भरत र ईशान किशन मध्य एकको सम्भावना छ । किशन भन्दा भरत अघि देखिन्छन् । अष्ट्रेलियाका स्तरिय स्पिनर नाथन लायनको सामना गर्न भारतीय ब्याटरलाई पनि सहज हुनेछैन ।
हेड टु हेड :
भारत र अष्ट्रेलियाबीच टेस्टमा १ सय २ खेल भएका छन् । जसमा अष्ट्रेलिया ४३ र भारत ३० खेलमा विजयी भएका छन् ।
अष्ट्रेलिया १५ खेलमा १० मा जित र १ मा हारसहित ७५.५६ जित प्रतिशतकका साथ शीर्षस्थानमा छ । अष्ट्रेलियाको फाइनल अनौपचारिक बाँकी देखिन्छ । भारत १४ खेलमा ८ मा जित र ४ मा हारसहित ५८.९३ जित प्रतिशतका साथ दोस्रो स्थानमा छ । २०२१ को टेस्ट च्याम्पियनसिप फाइनलमा भारत न्युजिल्यान्डसँगा ८ विकेटले पराजित भएको थियो । भारत यस पटक फाइनल खेल्न तीन खेल जित्नुपर्ने हुन्छ । अन्यथा श्रीलंका वा दक्षिण अफ्रिका मध्य एक टोली फाइनल खेल्नेछन् ।
श्रीलंका १० खेलमा ५ मा जित र ४ मा हारसहित ५३.३३ जित प्रतिशतका साथ तेस्रो स्थानमा छ । श्रीलंकाले अव न्युजिल्यान्डसँग दुई टेस्ट खेल खेल्न बाँकी छ । दक्षिण अफ्रिका १३ खेलमा ६ मा जित र ६ मा हारसहित ४८.७२ जित प्रतिशतका साथ चौथो स्थानमा छ । दक्षिण अफ्रिकाले वेस्टइन्डिजसँग दुई टेस्ट खेल खेल्न बाँकी छ । श्रीलंका र दक्षिण अफ्रिका भारतको हार चाहन्छन् ।
