काठमाडौं (हाम्रो खेलकुद) – आइसिसी विश्वकप लिग–२ त्रिकोणात्मक ओडिआई सिरिज खेल्न स्कटल्यान्डको टोली नेपाल आइपुगेको छ । स्कटल्यान्डको टोली विहीबार बिहान नेपाल आइपुगेको नेपाल क्रिकेट संघ (क्यान) का कोषाअध्यक्ष रोशनसिंहले जानकारी दिएका छन् ।

स्कटल्यान्डको टोली विहान ८: ४५ मा त्रिभुवन विमानस्थलमा आइपुगेको थियो । रोशनका अनुसार स्कटल्यान्डको टोलीले शुक्रबारदेखि मुलपानीमा अभ्यास गर्नेछ । अभ्यास खेल खेल्ने सम्भावना पनि छ । तर कुन टोलीसँग भने निर्धारण भएको छैन ।

आइसिसी विश्वकप लिग–२ को च्याम्पियन पक्काजस्तै बनेको स्कटल्यान्ड दुई नयाँ खेलाडीलाई मौका दिँदै नेपाल आएको छ । स्कटल्यान्डले युवा स्टार ज्याक जार्विसलाई पहिलो पटक समेटेको छ । उनले यू-१९ क्रिकेट प्रतियोगितामा सानदार प्रदर्शन गर्दै आएका छन् । तीव्र गतिमा बलिङ गर्ने उनले मध्यक्रममा राम्रो ब्याटिङ गर्नेछन् । उनले क्याम्पमा लगातार राम्रो प्रदर्शन गरेपछि मौका दिएको हो ।

त्यस्तै २१ वर्षीय तीव्र गतिका बलर लियाम नेलरलाई पनि मौका दिएको छ । उनलाई क्षमता विकाश गर्नको लागि नेपाल ल्याउने छ । लियामले गत वर्ष राम्रो प्रभाव छाडेका थिए ।

स्कटल्यान्डको यो अन्तिम लिग हो । नेपाल, नामिबिया र स्कटल्यान्डबीच त्रिकोणात्मक ओडिआई सिरिज हुनेछ । स्कटल्यान्ड ३२ खेलमा २२ मा जित र ८ मा हारसहित ४६ अंकका साथ शीर्ष स्थानमा छ । स्कटल्यान्ड शीर्ष स्थानमा रहँदै च्याम्पियन बन्नुको साथै सोझै एकदिवसीय विश्वकप ग्लोबल छनोटमा पुगि सकेको छ । अव बाँकी दुई टोलीले सोझै विश्वकपमा स्थान बनाउनेछन् । नेपालले भने शीर्ष तीनमा स्थान बनाउन बाँकी सबै खेल जित्नुपर्ने हुन्छ ।

नेपाल २४ खेलमा ८ मा जित र १४ मा हारका साथ १८ अंक जोड्दै छैटौं स्थानमा छ । नामिबिया ३० खेलमा १८ मा जित र ११ मा हारसहित ३७ अंक जोड्दै तेस्रो स्थानमा छ । नेपालले भने हालसम्म अन्तिम टोली घोषणा गरेको छैन । नेपालले शुक्रबार टोली घोषणा गर्ने सम्भावना छ । नामिबियाको टोली भने दुईदिनपछि आउने छ ।

स्कटल्यान्डको टोली :

रिची बेरिंगटन (कप्तान), काइल कोट्जर, म्याट क्रस (उप(कप्तान), क्रिस ग्रेभ्ब्स, ज्याक जार्विस, माइकल लिस्क, टम म्याकिन्टोस, क्रिस म्याकब्राइड, ब्रेन्डन म्याकुलम, जर्ज मुन्शे, लियाम नेलर (विकासको लागि लिएको खेलाडी), शफ्यान शरिफ, क्रिस सोले, हम्जा ताहिर, मार्क वाट् ।