एजेन्सी – ओपनर तथा विकेटकिपर मुनीवा अलीको सानदार ऐतिहासिक शतकमा पाकिस्तानले दक्षिण अफ्रिकामा जारी आइसिसी महिला टि२० विश्वकपमा आयरल्यान्डमाथि ७० रनको सानदार जित हात पारेको छ । जारी विश्वकपमा पाकिस्तानको यो पहिलो जित समेत हो।

केप टाउनमा टस हारेर पहिला ब्याटिङको निम्तो पाएको पाकिस्तानले निर्धारित २० ओभरमा ५ विकेट गुमाउँदै १ सय ६५ रन बनायो । पाकिस्तानकी मुनीवा अलीले ६८ बलमा १४ चौकासहित १ सय २ रनको सानदार शतकीय इनिङ खेलिन् । उनी पाकिस्तानबाट महिला टि२० आईमा शतक बनाउने उनी पहिलो खेलाडी हुन् ।

उनी टि२० विश्वकप इतिहासमा शतक हान्ने छैटौं खेलाडी हुन् । जारी विश्वकपमा शतक प्रहार गर्ने उनी पहिलो खेलाडी हुन् । निडा डरले २८ बलमा २ चौका र १ छक्कासहित ३३ रन बनाइन् । अन्य ब्याटरले भने राम्रो प्रदर्शन गर्न सकेनन् । आयरल्यान्डकी अर्लेन केलीले सर्वाधिक दुई विकेट लिइन् ।

जितको लागि १ सय ६६ रनको विजयी लक्ष्य पछ्याएको आयरल्यान्ड १६.३ ओभरमा ९५ रनमा अल आउट भयो । आयरल्यान्डकी ओर्ला प्रेंडरग्रास्टले सर्वाधिक ३१ रन बनाइन् । पाकिस्तानकी नर्षा सन्धुले ४ ओभरमा १८ रन खर्चेर ४ विकेट लिइन् । सदिया इकबाल र निदा डरले दुई दुई विकेट लिए ।

समूह बी मा रहेको पाकिस्तान २ खेलमा १ मा जित र १ मा हारसहित तेस्रो स्थानमा छ । आयरल्यान्ड दुई खेलमा अंक विहीन हुँदै पुछारमा छ ।

त्यस्तै समूह बी कै अर्को खेलमा भारतले वेस्टइन्डिजलाई ६ विकेटले पराजित गर्यो । केप टाउनमा टस जितेर पहिला ब्याटिङ थालेको वेस्टइन्डिजले निर्धारित २० ओभरमा ६ विकेट गुमाउँदै १ सय १८ रन बनायो । वेस्टइन्डिजकी स्टेफनी टेलरले ४० बलमा ६ चौकासहित सर्वाधिक ४० रन बनाइन् । भारतकी दिप्ती शर्माले ४ ओभरमा १५ रन खर्चेर ३ विकेट लिइन् ।

जितको लागि १ सय १९ रनको विजयी लक्ष्य पछ्याएको भारतले १८.१ ओभरमा ४ विकेट गुमाउँदै पूरा गर्यो । भारतको जितमा रिचा घोषले ३२ बलमा ५ चौकासहित सर्वाधिक ४४ रनमा अविजित रहिन् । कप्तान हरमनप्रीत कौर ३३, सफाली बर्मा २८ र स्मृति मन्धनाले १० रन बनाइन् ।

भारत २ खेलमा ४ अंकका साथ दोस्रो स्थानमा छ । इंग्ल्यान्ड २ खेलमा ४ अंकका साथ नेटरनरेटमा माथि रहँदै शीर्ष स्थानमा छ । समूह ए मा भने अष्ट्रेलिया २ खेलमा ४ अंकका साथ शीर्ष स्थानमा छ । श्रीलंकाको पनि २ खेलमा ४ अंकका भएपनि नेटरनरेटको कारण दोस्रो स्थानमा छ ।