काठमाडौं (हाम्रो खेलकुद) – नेपालले आइसिसी विश्वकप लिग–२ त्रिकोणात्मक ओडिआई सिरिज अन्तर्गत शुक्रबार स्कटल्यान्डविरुद्ध टोलीमा एक खेलाडी परिवर्तन गर्ने सम्भावना छ । नेपाल र स्कटल्यान्डबीचको खेल विहान ९ बजे टियु क्रिकेट मैदानमा सुरुहुनेछ ।

नेपाल आइसिसी विश्वकप लिग–२ च्याम्पियन स्कटल्यान्डलाई हराउँदै ओडिआई मान्यता मजबुत बनाउन चाहन्छ। नेपालले नामिबियालाई दुई विकेटले हराउनेक्रममा २ सय ८६ रनको लक्ष्य ८ विकेट गुमाउँदै पूरा गरेको थियो । जुन नेपालले ओडिआईमा पूरा गरेको सर्वाधिक ठूलो योगफल थियो ।

नेपाल २५ खेलमा ९ मा जित र १४ मा हारसहित २० अंकका साथ छैटौं स्थानमा छ । यता स्कटल्यान्ड तीन खेल अगाडिनै च्याम्पियन बन्दै यसै वर्ष हुने ग्लोबल छनोटमा सोझैं छनोट भएको छ । स्कटल्यान्ड ३३ खेलमा २३ मा जित र ८ मा हारसहित ४८ अंकका साथ शीर्ष स्थानमा छ ।

पछिल्लो खेल हेर्दा नेपालको टोलीमा एक मात्रै खेलाडी परिवर्तन गर्ने सम्भावना देखिन्छ । नेपाली टोलीमा तेस्रो तीव्र गतिको बलरको विकल्प छैन । गुलशन झालाई नेपालले स्कटल्यान्डविरुद्ध मैदान उतार्न सक्छ । त्यसको लागि एक खेलाडी बेन्चम राख्नु पर्ने हुन्छ । यदि खेलाडी परिवर्तन गर्दा कुशल मल्ल र ललितनारायण राजवंशी मध्य एकलाई बेन्चमा राख्न सक्छ।

नेपालले त्यहिँ टोलीलाई निरन्तरता दिनपनि सक्छ । खेलाडीलाई थप विश्वास दिन त्यहिँ टोली मैदान उतार्न सक्छ । खेलाडी परिवर्तन गर्दा ललित बेन्चमा बस्ने सम्भावना रहन्छ । कुशलले नामिबियाविरुद्ध ७ ओभरमा ३५ रन खर्चेर १ विकेट लिएका थिए । उनले नामिबियाका कप्तान जेरार्ड इरास्मसलाई ५६ रनमा क्याच आउट गराएका थिए । अर्का बायाँ हाते स्पिनर ललित नारायण राजवंशीले ६ ओभरमा ४० रन खर्चिएका थिए । कुशल ब्याटिङमा भने ६ रनमा आउट भएका थिए ।

कुशल पहिलो रोजाईमा नै खेल्ने सम्भावना छ । स्कटल्यान्डसँग दुई प्रमुख बायाँ हाते स्पिनर मार्क वाट र हम्जा ताहिर छन् । कुशललाई टोलीमा राख्दा नेपाल रणनीतिक रुपमा फाइदा पुग्नेछ । यदि शीर्षक्रम सस्तैमा आउट हुँदा कुशललाई मध्यक्रममा ब्याटिङ गराउन सक्छ ।

बायाँ हाते स्पिनर खेल्न बायाँ हाते ब्याटरलाई धेरै सहज हुन्छ । कुशल विकेट गुमेको अवस्थामा वा स्कटल्यान्डका स्पिनरमाथि हाबी बन्दा नेपालको इनिङ सम्हाल्न सक्छन् । कुशल राम्रो ब्याटिङ गर्दछन् । ललित ब्याटिङका लागि भने चिनिदैनन् । उता स्कटल्यान्डसँग प्रमुख दुई बायाँ हाते स्पिनर हुँदा कुशल खेल्ने देखिन्छ । ललितको स्थानमा गुलशन खेल्नसक्छन् । गुलशनले ब्याटिङ बलियो हुनेछ । गुलशन बायाँ हातले ब्याटिङ गर्ने गर्दछन् ।

ओपनरमा कुशल भुर्तेल र आसिफ शेख हुनेछन् । कुशलले नामिबियाविरुद्ध १ सय १५ रनको शतकीय इनिङ खेल्दा आसिफ शून्यमा आउट भएका थिए । आसिफ दोस्रो खेलमा ठूलो इनिङ खेल्ने टोलीले विश्वास राखेको छ । कुशलबाट पहिलो इनिङको प्रदर्शन निरन्तरता चाहन्छ । ज्ञानेन्द्र मल्लले पाएको सुरुवातलाई ठूलो इनिङमा बदल्नु पर्ने हुन्छ ।

ज्ञानेन्द्र २५ रनमा आउट भएका थिए । ७२ रनको इनिङ खेलेका रोहित नेपालका मध्यक्रमका खम्बा हुन् । उनको प्रदर्शनले योगफल निर्धारण गर्नेछ । दीपेन्द्र ७ रनमा आउट भएका थिए । दीपेन्द्रलाई ठूलो इनिङको दबाब छ । उनको ओडिआईमा औसत रन १६.८० छ । दीपेन्द्र टिमले देखाएको विश्वास दोस्रो खेलमा निराश बनाउन चाहदैनन् । सन्दीप जोराले टोलीमा फिनिसरको जिम्मा पाउनेछन् । जोराले नामिबियाविरुद्ध २८ रनको इनिङ खेलेका थिए ।

गुलशनलाई खेलाउँदा नेपालको ब्याटिङ १० औं नम्बरसम्म हुनेछ । तल्लोक्रममा कुशल मल्ल, गुलशन झा, करण केसी र सोमपाल कामी हुनेछन् । यी चार नै खेलाडी राम्रो ब्याटिङको क्षमता राख्छन् । करण केसीले एक ओभरमै खेललाई मोड्न सक्छन् । करण विष्फोटक ब्याटिङको खुबी भएको ब्याटर हुुन् ।

नेपालसँग तीव्र गतिका बलरमा गुलशन, करण र सोमपाल कामी हुनेछन् । करणले नामिबियाविरुद्ध पाँच विकेट लिएका थिए । स्पिनरमा सन्दीप लामिछाने प्रमुख बलरको रुपमा खेल्नेछन् । सन्दीपलाई कुशल र दीपेन्द्रले स्पिन आक्रामणमा साथ दिनेछन् ।

नेपालको सम्भावित प्लेइङ ११ :

आसिफ शेख, कुशल भुर्तेल, ज्ञानेन्द्र मल्ल, रोहित पौडेल (कप्तान), सन्दीप जोरा, दीपेन्द्रसिंह ऐरी, कुशल मल्ल, सोमपाल कामी, गुलशन झा, करण केसी र सन्दीप लामिछाने ।