एजेन्सी – विकेटकिपर एलिसा हेलीको कीर्तिमानी ब्याटिङमा अष्ट्रेलियाले दक्षिण अफ्रिकामा जारी महिला टि२० विश्वकपमा श्रीलंकालाई १० विकेटले पराजित गरेको छ । लगातार तेस्रो जितसँगै अष्ट्रेलिया सेमिफाइनलमा पुग्न एक कदम टाढा छ ।

जितको लागि १ सय १३ रनको विजयी लक्ष्य पछ्याएको अष्ट्रेलियाले १५.५ ओभरमा कुनै विकेट नगुमाई पूरा गर्यो । एलिसा हेली ४३ बलमा ६ चौका र १ छक्कासहित ५४ रनमा अविजित रहिन् ।

हेली महिला टि२० विश्वकपमा ७ अर्धशतक प्रहार गर्ने पहिलो खेलाडी बनेकी छिन् । उनले वेस्टइन्डिजकी स्टेफली टेलर र न्युजिल्यान्डकी सुजी बेट्सको ६-६ अर्धशतकको कीर्तिमानलाई पछि पारेकी हुन् । बेथ मुनी ५३ बलमा ७ चौकासहित ५६ रनमा अविजित रहिन् ।

त्यसअघि टस हारेर पहिला ब्याटिङको निम्तो पाएको श्रीलंकाले निर्धारित २० ओभरमा ८ विकेट गुमाउँदै १ सय १२ रन बनाएको थियो । श्रीलंकाकी ओपनर हर्षिता माधवीले ४० बलमा ३ चौकासहित सर्वाधिक ३४ रन बनाइन् । अष्ट्रेलियाकी मेगन स्कटले ४ ओभरमा २४ रन खर्चेर ४ विकेट लिइन् ।

समूह ए मा अष्ट्रेलिया ३ खेलमा ६ अंकका साथ शीर्ष स्थानमा छ । अष्ट्रेलियाले समूह चरणको अन्तिम खेलमा शनिबार दक्षिण अफ्रिकासँग खेल्नेछ । अष्ट्रेलिया उक्त खेलमा विजयी हुँदा अपराजित रहँदै सेमिफाइनलमा पुग्नेछ।

पराजित हुँदा पनि नेटरनरेटको कारण सेमिफाइनल खेल्ने समिकरण देखिन्छ । श्रीलंका ३ खेलमा २ मा जित र १ मा हारसहित ६ अंकका साथ दोस्रो स्थानमा छ । दक्षिण अफ्रिका २ खेलमा १ मा जित र १ मा हारसहित तेस्रो स्थानमा छ ।