काठमाडौं (हाम्रो खेलकुद) – सन्दीप जोरा र दीपेन्द्रसिंह ऐरीको उत्कृष्ट रन आउटको सहयोगमा आइसिसी विश्वकप लिग–२ त्रिकोणात्मक ओडिआई सिरिज अन्तर्गत नामिबियाका शतकधारी माइकल भान लिंगेन रन आउट भएका छन् ।

टियु क्रिकेट मैदानमा टस हारेर पहिला ब्याटिङको निम्तो पाएको नामिबियाले २८ ओभरमा ३ विकेट गुमाउँदै १ सय रन बनाएको छ । नामिबियाका कप्तान जेरार्ड इरास्मस १५ र जेन निकोल लोफ्टी इआटन ३ रनमा अविजित छन् । २६ औं ओभरको अन्तिम बलमा लिंगेन २२ रनमा रन आउट भए ।

लिंगेनले खेलेको शट सन्दीप जोराले दीपेन्द्रलाई उत्कृष्ट थ्रो दिएका थिए । सन्दीप जोराको उक्त थ्रोसँगै नन स्ट्राइक एण्डमा रन आउट गर्दै शतकधारी लिंगेनलाई पेभेलिएन फर्काएका हुन् । पछिल्ला दुई खेलमा लिंगेनले नेपालविरुद्ध १ सय २१ र १ सय ३३ रनको शतकीय इनिङ खेलेका थिए ।

नामिबियाका लो ह्यान्डरे लरेन्स ५४ बलमा ८ चौकासहित ४१ रनमा सन्दीपको बलमा बोल्ड आउट भए । ओपनर कार्ल ब्रिकेनस्टक २० रनमा फस्ट स्लिपमा ज्ञानेन्द्र मल्लबाट क्याच आउट भए । सन्दीपले १५ औं ओभरको तेस्रो बलमा क्याच गराउँदै नेपाललाई पहिलो सफलता दिलाएका थिए ।

पहिलो खेलमा नेपालले नामिबियालाई दुई विकेटले हराएको थियो । उक्त खेलमा नेपालले २ सय ८६ रनको विजयी लक्ष्य पूरा गरेको थियो । जुन नेपालले आफ्नो ओडिआई ईतिहासमा पूरा गरेको सर्वाधिक ठूलो योगफल थियो । दोस्रो खेलमा नेपालले स्कटल्यान्डलाई तीन विकेटले हराएको थियो । स्कटल्यान्डलाई हराउनेक्रममा नेपालले २ सय ७५ रनको लक्ष्य पूरा गरेको थियो । नेपालले लगातार तेस्रो पटक टस जितेको हो ।
नेपालको प्लेइङ ११ :
रोहित पौडेल (कप्तान), कुशल भुर्तेल, आसिफ शेख (विकेटकिपर), ज्ञानेन्द्र मल्ल, कुशल मल्ल, दीपेन्द्रसिंह ऐरी, सन्दीप जोरा, सोमपाल कामी, करण केसी, सन्दीप लामिछाने र गुलशन झा ।