काठमाडौं (हाम्रो खेलकुद) – नेपालले आइसिसी विश्वकप लिग–२ अन्तर्गत बाँकी सबै ९ खेल जित्न सके शीर्ष तीनमा पर्दै सोझै विश्वकप छनोट खेल्न पाउने भएको छ । नामिबिया अन्तिम खेलमा स्कटल्यान्डसँग पराजित भएसँगै नेपाललाई सोझै विश्वकप छनोट खेल्ने अवसर खुलेको हो ।

नेपाल २७ खेलमा ११ मा जित र १४ मा हारसहित २४ अंकका साथ छैटौं स्थानमा छ । नेपाल सबै खेल जित्दा ४२ अंकमा पुग्छ । ४२ अंक नेपाल शीर्ष तीनमा पर्न पर्याप्त हुनेछ । आइसिसी विश्वकप लिग-२ को शीर्ष तीन टोली आगमी जुन जुलाईमा जिम्बावेमा हुने एकदिवसीय विश्वकप छनोट खेल्न पाउनेछन् ।

स्कटल्यान्ड ३५ खेलमा २४ मा जित र ९ मा हारसहित ५० अंकका साथ शीर्ष स्थानमा रहँदै च्याम्पियन बनि सकेको छ । ओमान ३६ खेलमा २१ मा जित र १३ मा हारसहित ४४ अंकका साथ दोस्रो स्थानमा छ । ओमान र स्कटल्यान्ड जिम्बावेमा हुने एकदिवसीय विश्वकप छनोट खेल्ने पक्का भएको छ।

अव तेस्रोे टोलीमा नेपाल, युएई र नामिबियाबीच प्रतिस्पर्धा हुनेछ । नेपालले सबै खेल जित्दा ४२ अंक हुन्छ । नामिबियाले बाँकी दुई खेल जित्दा ४१ अंकमा मात्रै पुग्नसक्छ । युएई यदि नेपालसँग सबै खेलमा पराजित हुने हो भने र बाँकी सबै खेल जित्दा ३९ अंकमा मात्रै पुग्न सक्छ । त्यसैले यदि नेपालले बाँकी सबै खेल जित्ने हो भने शीर्ष तीनमा पर्ने पक्का हुनेछ।

शीर्ष तीनमा पर्न नसके भने प्लेअफ क्वालिफायर खेल्नुपर्ने हुन्छ । जसमा लिग २ मा पुछारका चार टोली, क्यानडा र जर्सीबीच प्रतिस्पर्धा हुनेछ । जसबाट शीर्ष दुई टोलीले जिम्बावेमा हुने विश्वकप छनोट खेल्ने पाउनेछन् । प्लेअफ क्वालिफायर नै विश्वकप छनोट खेल्न पाउने अन्तिम अवसर हो ।

नेपालले अव मंगलबार स्कटल्यान्डसँग खेल्नेछ । त्यसपछि युएईमा गएर युएई र पपुवा न्युगिनीसँग अर्को साता दुई दुई खेल खेल्नेछ । त्यो सिरिज सकिए लगत्तै नेपालले घरेलु मैदानमा युएई र पपुवा न्युगिनीसँग दुई दुई खेल खेल्नेछ । नेपालले समग्रमा घरेलु मैदानमा पाँच र युएईमा चार खेल खेल्नेछ । उक्त सिरिज पपुवा न्युगिनीमा हुनुपर्ने भएपनि त्यहाँ खेल्न संरचना राम्रो नभएपछि युएईमा सारिएको हो ।

उता युएईले नेपाल र पपुवा न्युगिनीसँग समान चार खेल खेल्नेछ । नामिबियासँग दुई खेल खेल्न बाँकी छ । युएईले खेल्न १० मध्य ६ खेल घरेलु मैदान र ४ खेल नेपालमा छन् । यदि युएई सबै खेलमा विजयी हुँदा नेपाल शीर्ष पाँचमा रहँदै ओडिआई मान्यता कायमै राख्ने सम्भावना समाप्त हुनेछ । युएईले बाँकी सबै १० खेल जित्दा ४७ अंकमा पुग्नेछ । नेपालसँग चार खेलमा हार्दा र बाँकी ६ खेल जित्दा ३९ अंकमा पुग्नेछ ।

जिम्बावेमा हुने एकदिवसीय विश्वकप छनोटमा लिग–२ का शीर्ष तीन टोली, प्लेअफ क्वालिफायरबा दुई टोली र सुपर लिगका पुछारका पाँच टोली गरि कुल १० टोलीबीच प्रतिस्पर्धा हुनेछ ।

एकदिवसीय विश्वकप छनोटका शीर्ष दुई टोलीले आगमी अक्टोबर नोभेम्बरमा भारतमा हुने एकदिवसीय विश्वकप खेल्न पाउनेछन् । नेपाललाई शीर्ष पाँचमा रहँदै ओडिआई मान्यता जोगाउन बाँकी ९ मध्य ६ खेल जित्नुपर्ने हुन्छ ।

के हो सुपर लिग ?

छनोटको सबैभन्दा माथिल्लो श्रेणीको रुपमा रहेको विश्वकप सुपर लिगमा १२ टेस्ट टोलीसँगै नेदरल्यान्ड्सले प्रतिस्पर्धा गरिरहेका छन् । आयोजक भारतसँगै इंग्ल्यान्ड, अष्ट्रेलिया, न्युजिल्यान्ड, बंगलादेश, अफगानिस्तान र पाकिस्तानले अंक तालिकामा बलियो प्रस्तुतिका साथ विश्वकपमा सोझै स्थान बनाएका छन् ।

अव ६ मध्य एक टोलीले मात्रै सोझै भारतमा हुने विश्वकप खेल्न पाउनेछ । बाँकी पाँच टोलीले विश्वकप छनोट खेल्नुपर्ने हुन्छ । सोझै विश्वकप खेल्नेमा दक्षिण अफ्रिकाको उच्च सम्भावना छ ।

श्रीलंका, वेस्टइन्डिज जस्ता ठूला देशले यो पटक विश्वकप छनोट खेल्नुपर्ने सम्भावना उच्च देखिन्छ । आइसिसी सुपर लिगमा हरेक टोलीले कुल २४ खेल खेल्नुपर्ने छ । जसबाट आयोजक भारतसँगै शीर्ष ८ टोली सोझै विश्वकपमा पुग्नेछन् । ७ टोली सोझै विश्वकपमा पुगेका छन् ।

पुछारका पाँच टोलीले ग्लोबल विश्वकप छनोट खेल्नुपर्ने हुन्छ । वेस्टइन्डिज २४ खेलमा ९ मा जित र १५ मा हारसहित ८८ अंकका साथ आठौं स्थानमा छ । दक्षिण अफ्रिका १९ खेलमा ७ मा जित र १० मा हारसहित ७८ अंकका साथ नवौं स्थानमा छ । दक्षिण अफ्रिकाले नेदरल्यान्ड्ससँग दुई खेल खेल्न बाँकी छ ।

श्रीलंका २१ खेलमा ७ मा जित र १२ मा हारसहित ७७ अंकका साथ १० औं स्थानमा छ । श्रीलंकाले न्युजिल्यान्डसँग तीन खेल खेल्नेछ । आयरल्यान्ड २१ खेलमा ६ मा जित र १३ मा हारका साथ ६८ अंकका साथ ११ औं स्थानमा छ । जिम्बावे २१ खेलमा ४ मा जित र १६ मा हारसहित ४५ अंकका साथ १२ औं स्थानमा छ । नेदरल्यान्ड्स १९ खेलमा २ मा जित र १६ मा हारकासाथ २५ अंक जोड्दै १३ औं स्थानमा छ ।

जिम्बावे र नेदरल्यान्ड्सले क्वालिफायर खेल्ने पक्का भएको छ । वेस्टइन्डिज, दक्षिण अफ्रिका, श्रीलंका र आयरल्यान्ड मध्य तीन टोलीले ग्लोबल छनोट खेल्नेछन् । दक्षिण अफ्रिकाले नेदरल्यान्ड्ससँग खेल्न बाँकी हुँदा पुछारमा रहँदै ग्लोबल छनोट खेल्ने पाँच टोलीमा वेस्टइन्डिज, श्रीलंका, आयरल्यान्ड, जिम्बावे र नेदरल्यान्ड्स देखिन्छन् । सुपर लिगमा एक जितको १० अंक मिल्ने गर्दछ ।