एजेन्सी – आइसिसी विश्वकप लिग–२ त्रिकोणात्मक ओडिआई सिरिजमा नामिबियाले आफ्नो अन्तिम खेलमा युएईलाई ७ विकेटले पराजित गरेको छ । योसँगै नामिबिया ३६ खेलमा ३९ अंकका साथ लिग–२ समाप्त गरेको छ ।

जितको लागि १ सय ६७ रनको विजयी लक्ष्य पछ्याएको नामिबियाले २८.२ ओभरमा ३ विकेट गुमाउँदै पूरा गर्यो । नामिबियाको जितमा माइकल भान लिंगेनले ५३ बलमा १० चौका र १ छक्कासहित सर्वाधिक ७१ रनको योगदान दिए । लो ह्यान्डरे लरेन्सले ५९ बलमा ६ चौकासहित ४७ रन बनाए ।

त्यसअघि दुबई इन्टरनेशल स्टेडियममा टस हारेर पहिला ब्याटिङको निम्तो पाएको युएईले निर्धारित ५० ओभरमा ९ विकेट गुमाउँदै १ सय ६६ रन बनायो । युएईका कप्तान सिपी रिजवानले १ सय ४० बलमा २ चौकासहित सर्वाधिक ६० रनमा अविजित रहे । नामिबियाका बेन सिंकोगोले ७ ओभरमा १ मेडनसहित २७ रन खर्चेर २ विकेट लिए । टांगेनी लुंगामेनी र जेरार्ड इरास्मसले २–२ विकेट लिए ।

नामिबिया ३६ खेलमा १९ मा जित र १६ मा हारसहित ३९ अंकका साथ तेस्रो स्थानमा छ । स्कटल्यान्ड ३६ खेलमा ५० अंकका साथ च्याम्पियन बनि सकेको छ । ओमान ३६ खेलमा ४४ अंकका साथ दोस्रो स्थानमा छ । नेपाल २८ खेलमा १२ मा जित र १४ मा हारसहित २६ अंकका साथ छैटौं स्थानमा छ ।

लिग २ का शीर्ष तीन टोली आगमी जुन जुलाईमा हुने एकदिवसीय विश्वकप छनोट सिधैं छनोट खेल्न पाउनेछन् । शीर्ष पाँच टोलीले सोझै ओडिआई मान्यता प्राप्त गर्नेछन् । स्कटल्यान्ड र ओमान सोझै विश्वकप छनोटमा पुगेका छन् ।

लिग २ का पुछारका चार टोलीले प्लेअफ खेल्नुपर्ने हुन्छ । नेपाल शीर्ष तीनमा पर्न बाँकी सबै ८ खेल जित्नुपर्ने हुन्छ । नेपाल सबै खेलमा विजयी हुँदा ४२ अंकमा पुग्नेछ । नेपालसँगको चार खेलमा पराजित हुँदा युएई बाँकी चार जितले ३७ अंकमा रोकिनेछ । नेपाललाई अव जतिधेरै युएईको हार त्यति धेरै फाइदा पुग्ने समिकरण देखिन्छ ।

युएईको यस हारले शीर्ष तीनमा पर्न अव नेपालले ८ मध्य ७ खेल जिते हुनेछ । बाँकी ७ खेलमा विजयी हुँदा नेपाल ४० अंकमा पुग्नेछ । जुन शीर्ष तीनमा पर्न पर्याप्त हुनेछ । नेपाल ८ मध्य ६ खेलमा पराजित हुँदा भने शीर्ष तीनको सम्भावना समाप्त हुने भएको छ ।

नेपालले अव युएईसँग चार मध्य तीन खेल र पपुवा न्युगिनीलाई चारै खेलमा हराउँदा पनि शीर्ष तीनमा पर्नेछ । अव नेपालले पपुवा न्युगिनीसँग चार र युएईसँग चार खेल खेल्नेछ । नेपालले पपुवा न्युुगिनी र युएईसँग समान–२ खेल घरेलु मैदानमा खेल्नेछन् । दुई दुई खेल युएईमा खेल्नेछ । नेपाली टोली आज युएई प्रस्थान गरेको छ । नेपालले पहिलो खेल २७ फेब्रुअरीमा पपुवा न्युगिनीसँग खेल्नेछ ।