एजेन्सी – स्पेनले टि२० आई क्रिकेट इतिहासकै दुई दुर्लभ कीर्तिमान कायम गर्दै इतिहास रचेको छ । आइल अफ म्यानलाई मात्रै १० रनमा अल आउट गर्दै दुई बलमा जितका साथ स्पनेले टि२० क्रिकेट इतिहासमै नयाँ दुर्लभ कीर्तिमान रचेको छ ।

ला मंगा क्लब बोटोम ग्राउन्डमा टस हारेर पहिला ब्याटिङ थालेको आइल अफ म्यान ८.४ ओभरमा १० रनमा अल आउट भयो । यो टि२० आई इतिहासकै सर्वाधिक कम योगफल हो । यसअघि टि२० आईमा कम योगफल टर्कीको चेक रिपब्लिकनविरुद्ध २१ रन थियो ।

उसका लागि ७ खेलाडीले खाता खोल्न सकेनन् । जोशेफ बुराओसले ७ बलमा सर्वाधिक ४ रन बनाए । आइललाई १० रनमा अल आउट गर्न स्पेनका अतिफ मेहमुदले ४ ओभरमा २ मेडनसहित ६ रन खर्चेर ४ विकेट लिए । मोहम्मद कमरनले ४ ओभरमा १ मेडनसहित ४ रन खर्चेर ४ विकेट लिए । लोनी ब्रुन्सले ४ बलमा दुई विकेट लिएका थिए ।

जितको लागि ११ रनको विजयी लक्ष्य स्पेनले २ बलमै पूरा गर्यो । पहिलो बल नो फ्याँल्दा त्यसपछिका दुई बलमा आविस अहमदले लगातार दुई छक्का हान्दै खेल सकाएका थिए ।

दुई बलमा जित टि२० आईमा सर्वाधिक छिटो हो । टि२० आईमा यसअघि सर्वाधिक छिटो जित २.३ ओभरमा केन्याले मालीलाई २०२२ मा ३१ रनको विजयी लक्ष्य पछ्याउदा गरेको थियो । अन्तर्राष्ट्रिय मान्यता खेलमा दुई बलमा जित स्पेनले नेपालसँगको कीर्तिमान बराबर गरेको छ ।

नेपालले २००६ मा म्यानमारविरुद्ध एसिसी ट्रफीमा ११ रनको लक्ष्य दुई बलमै पूरा गरेको थियो । स्पेन र आइल अफ म्यानबीच ६ टि२० आई खेलको सिरिज भएको थियो । स्पेनले ६ टि२० आई खेलको सिरिज ५-० ले जित्यो । दोस्रो खेल भने वर्षाको कारण हुन सकेको थिएन ।