दुबई (हाम्रो खेलकुद) – नेपालले आइसिसी यू–१९ विश्वकप एसिया क्षेत्र छनोट अन्तर्गत हङकङविरुद्ध सानदार प्रदर्शन गरेको छ । मलेक क्रिकेट ग्राउन्डमा टस जितेर पहिला ब्याटिङ रोजेको हङकङले ४३ ओभरमा ८ विकेट गुमाउँदै १ सय ७ रन बनाएको छ ।

हङकङका पर्थ भगवत ९३ बल खेल्दै ४ चौकासहित सर्वाधिक ३६ रनमा क्याच आउट भए । स्पिनर दीपेश कँडेलको बलमा दीपक डुम्रेबाट क्याच आउट भएका थिए । मोहम्मद अलियान जाहिर ६७ बलमा ३ चौकासहित २९ रनमा आउट भए ।

नेपालका सुवास भण्डारीले १० ओभरमा ३ मेडनसहित १० रन खर्चेर २ विकेट लिए । सुवासले ६० मध्य ५१ बल डट राखेका थिए । हेमन्त धामीले ७ ओभरमा १४ रन खर्चेर २ विकेट लिए । हङकङका अरेज दार २ र शिव महथुर ८ रनमा हेमन्तको धामीको बलमा क्याच आउट भएका थिए ।

नेपालले आज एक परिवर्तन गरेको छ । दीपक बोहराको स्थानमा उत्तम थापामगरलाई डेब्यू दिएको छ । नेपाल प्रतियोगितामा लगातर तेस्रो जितको सोचमाछ। ६ टोली सहभागी यस प्रतियोगिता विजेता टोलीले आगमी वर्ष श्रीलंकामा हुने यू(१९ विश्वकप खेल्न पाउनेछ । नेपाल प्रमुख दावेदार टोली हो ।

नेपालले पहिलो खेलमा सिंगापुरलाई ९६ रन र कुवेतलाई २ सय ४३ रनको फराकिलो अन्तरले पराजित गरेको थियो । यता युएईले मलेसियालाई ७ विकेट र हङकङलाई १ सय ६३ रनले हराएको थियो । समान ४ अंक भएपनि नेटरनरेटमा माथि रहँदै युएई शीर्ष स्थानमा छ ।