दुबई (हाम्रो खेलकुद) – नेपालले पहिलो पटक आफ्नो ओडिआई क्रिकेट इतिहासमा लगातार पाँच जितका साथ कीर्तिमान बनाएको छ। आइसिसी विश्वकप लिग-२ त्रिकोणात्मक ओडिआई सिरिजमा नेपालले पपुवा न्युगिनीलाई चार विकेटले हराउँदै कीर्तिमान कायम गरेको हो ।

यो नेपालको ओडिआईमा लगातार पाँचौं जित हो । यसअघि ओडिआई क्रिकेटमा नेपालले लगातार चार जित सम्म हात पारेको थियो । यसअघि ज्ञानेन्द्र मल्लको कप्तानीमा नेपालले ओडिआईमा २०२० र २०२१ मा गरेर लगातार चार जित हात पारेको थियो । २०२० मा आइसिसी विश्वकप लिग-२ मा फेब्रुअरीमा घरेलु मैदान टियुमा अमेरिकालाई ३५ रनमा अल आउट गर्दै ८ विकेटको जित हात पारेको थियो ।

त्यसपछि २०२१ सेप्टेम्बरमा पपुवा न्युगिनीसँगको दुई ओडिआई खेलको सिरिजमा दुई विकेट र १ सय ५१ रनले विजयी भएको थियो । लिग(२ मा नै अमेरिकालाई पहिलो खेलमा पाँच विकेटले हराउँदा लगातार चार जित हात पारेको थियो । यस पटक रोहित पौडेलको कप्तानीमा नेपालले नयाँ इतिहास रचेको हो । नेपालले सबै खेलमा टस जित्दै लक्ष्य पछ्याउँदा खेल जितेको हो ।

नेपालले अघिल्लो साता घरेलु मैदान टियुमा पहिलो खेलमा नामिबियालाई दुई विकेट, दोस्रो खेलमा स्कटल्यान्डलाई तीन विकेट, नामिबियालाई तीन विकेट र स्कटल्यान्डलाई दुई विकेटले हराएको थियो । नेपाल शीर्ष तीनमा रहँदै सोझै विश्वकप छनोट खेल्न अव बाँकी ७ मध्य ६ खेल जित्नुपर्ने हुन्छ ।

नेपालले दुबई इन्टरनेशल क्रिकेट स्टेडियममा घरेलु टोली युएईसँग दुई र पपुवा न्युगिनीसँग एक खेल खेल्नेछ । त्यस सिरिजपछि घरेलु मैदान टियुमा युएई र पपुवा न्युगिनीसँग समान दुई खेल खेल्नेछ ।

नेपाल २९ खेलमा १३ मा जित र १४ मा हारसहित २८ अंकका साथ छैटौं स्थानमा छ । आइसिसी विश्वकप लिग–२ का शीर्ष तीन टोलीले आगमी जुन जुलाईमा जिम्बावेमा हुने सोझै विश्वकप छनोट खेल्न पाउनेछन् । स्कटल्यान्ड ३६ खेलमा २४ मा जित र १० मा हारसहित ५० अंकका साथ च्याम्पियन बन्दै विश्वकप छनोटमा पुगेको छ । ओमान ३६ खेलमा २१ मा जित र १३ मा हारसहित ४४ अंकका साथ दोस्रो स्थानमा रहँदै विश्वकप छनोटमा पुगेको छ ।

अव नेपाल, नामिबिया र युएई मध्य एक टोली शीर्ष तीनमा रहँदै विश्वकप छनोट सोझै खेल्न पाउनेछन् । नेपाललाई शीर्ष पाँचमा रहँदै सोझै ओडिआई मान्यता जोगउन अव चार खेल जित्नुपर्ने हुन्छ ।

लिग २ का पुछारका चार टोलीले क्वालिफायर प्ले अफ खेल्नु पर्ने हुन्छ । क्वालिफायर प्लेअफमा लिग २ का पुछारका चार टोली र क्यानडा र जर्सी रहनेछन् । लिग २ का शीर्ष पाँच टोलीले सोझै ओडिआई मान्यता प्राप्त गर्नेछन् । क्वालिफायर प्लेअफमा शीर्ष चारमा रहने दुई टोलीले ओडिआई मान्यता प्राप्त गर्नेछन् ।

अंक तालिका

स्कटल्यान्ड ३६ खेलमा २४ मा जित र १० मा हारका साथ ५० अंकका साथ शीर्ष स्थानमा रहँदै अन्त्य गर्यो । ओमान ३६ खेलमा २१ मा जित र १३ मा हारसहित ४४ अंकका साथ दोस्रो स्थानमा छ । नामिबिया ३६ खेलमा १९ मा जित र १६ मा हारका साथ ३९ अंकका साथ तेस्रो स्थानमा छ ।

अमेरिका ३६ खेलमा १६ मा जित र १७ मा हारसहित ३५ अंकका साथ चौथो स्थानमा छ । युएई २८ खेलमा १३ मा जित र १२ मा हारसहित २९ अंकका साथ पाँचौं स्थानमा छ । नेपाल २९ खेलमा १३ मा जित र १४ मा हारसहित २८ अंकका साथ छैटौं स्थानमा छ । पपुवा न्युगिनी २९ खेलमा २ मा जित र २६ मा हारसहित ५ अंक जोड्दै पुछारमा छ।