भुपेन्द्र जि.सी./दुबई

नेपाली यू-१९ टोलीले आइसिसी यू-१९ विश्वकप एसिया क्षेत्र छनोटमा अन्तिम खेलमा युएईलाई पराजित गरे ८ वर्षपछि विश्वकप खेल्नेछ । नेपाल र युएईले सुरुवाती चार खेलमा लगातार जित हात पारेपछि अन्तिम खेलको विजेता टोली २०२४ मा श्रीलंकामा हुने यू१९ विश्वकप खेल्ने पक्का भएको हो ।

नेपालले मंगलबार मलेसियालाई १० विकेटले हराउँदै लगातार चौथो जित हात पार्यो । उता युएईले कुवेतलाई ८ विकेटले हराउँदै लगातार चौथो जितका साथ शीर्षस्थान कायम राखेको छ । नेटरनरेटका कारण युएई शीर्ष स्थानमा छ । युएई ४ खेलमा ८ अंकका साथ ४.२६८ नेटरनरेट सहित शीर्ष स्थानमा छ।

नेपाल ४ खेलमा ८ अंकका साथ दोस्रो स्थानमा छ । नेपालको नेटरनरेट ३.८२९ छ । नेपाल र युएईबीचको खेल बिहीबार आजमानका रहेको इडेन गार्डेनमा हुनेछ । उक्त खेलको विजेता टोली प्रतियोगिता च्याम्पियन बन्नेछ । प्रतियोगिता च्याम्पियन टोलीले २०२४ मा हुने यू-१९ विश्वकप खेल्न पाउनेछ । नेपाल आठौं र युएई चौथो पटक यु१९ विश्वकप खेलने सोचका साथ मैदान प्रवेश गर्नेछन् ।

नेपालले सिंगापुरलाई ९६, कुवेतलाई २ सय ४३, हङकङलाई ९ विकेट र मलेसियालाई १० विकेटले हराएको थियो । घरेलु टोली युएईले मलेसियालाई ७ विकेट, हङकङलाई १ सय ६३ रन, सिंगापुर र कुवेतलाई ८–८ विकेटले हराएको थियो । पहिलो खेलमा नेपाललाई सहज जित दिलाउन आकाश त्रिपाठीले ७८ र विशाल विक्रम केसीले ६३ रनको अर्धशतकीय इनिङ खेलेका थिए ।

बलिङमा हेमन्त धामी र सुवास भण्डारीले दुई दुई विकेट लिएका थिए । दोस्रो खेलमा कुवेतलाई फराकिलो अन्तरले हराउन ओपनर अर्जुन कुमालले १ सय ८, देव खनालले १ सय २५ र आकाश चन्दले ६ विकेट लिएका थिए ।

पहिलो खेलमा आकाश त्रिपाठी, दोस्रो खेलमा आकाश चन्द, तेस्रो खेलमा हेमन्त धामी र चौथो खेलमा दीपेश कँडेल प्लेयर अफ द म्याच चुनिएका थिए । हङकङलाई हराउन नेपालका हेमन्त धामीले ३, आकाश चन्द र सुवास भण्डारीले २–२ विकेट लिएका थिए । ब्याटिङमा आकाश त्रिपाठीले ६४ र उत्तम थापामगरले ३९ रन जोडेका थिए ।

मलेसियालाई १० विकेटले हराउन स्पिनर दीपेश कँडेलले १० ओभरमा ४ मेडनसहित ५१ बल डट राख्दै ११ रन खर्चेर ४ विकेट लिए । दीपक बोहरा ३८ र अर्जुन कुमाल २१ रनमा अविजित रहे ।

नेपालको कप्तानी देव खनाल र युएईको आयन अफ्जल खानले गरेका छन् । यी दुवै युवा खेलाडीले सिनियर टोलीबाट खेलेका छन् । यी दुई खेलाडीको प्रदर्शन निकै महत्वपूर्ण हुनेछ । तुलनात्मक रुपमा युएई भन्दा यू१९ मा नेपाल मजबुत देखिएको छ । युएईको मध्यक्रम ब्याटिङ नेपालको भन्दा तुलनात्मक रुपमा कमजोर छ । तीव्र गतिको बलिङ पनि नेपालको तुलनात्मक रुपमा मजबुत छ ।

२०१९ को एसिया क्षेत्र छनोटमा नेपाल डकवर्थ लेविस पद्धतिको आधारमा युएईसँग एक रनले पराजित भएको थियो । त्यहिँ एक रनको कारण २०२० मात्रै होईन २०२२ को पनि विश्वकप खेल्न पाएन । २०२१ मा कोरोनाको कारण यू१९ विश्वकप एसिया क्षेत्र छनोट हुन सकेन । पछिल्ला पाँच छनोटको प्रदर्शनको आधार मान्दा युएई अघि रहेको थियो । युएई अघि रहनमा त्यहिँ एक रनको जित निर्णायक बनेको थियो ।

कप्तान देव खनालले त्यो दिन जसले उत्कृष्ट क्रिकेट खेल्छ त्यसैले जित्ने बताउँछन् । ‘इतिहास लेखाउन अव एक कदम टाढा छौं । मलाई लाग्छ युएई र हाम्रो टिम बराबर छ । बिहीबार जसले उत्कृष्ट क्रिकेट खेल्छ उसले जित्ने हो । टिममा राम्रो माहोल । सबैजना ८ वर्षपछि विश्वकप खेल्न चाहन्छन् । आशा गरौं राम्रो हुनेछ’, देव खनालले भने ।

मुख्य प्रशिक्षक जगत टमाटा पनि विश्वकप खेल्ने नै बताउँछन् । ‘अव एउटा खेल हो । हाम्रो लक्ष्य पनि जसरी पनि विश्वकप खेल्ने हो । मलाई लाग्छ राम्रै हुन्छ’, टमाटाले भने ।

सन् १९८८ देखि सुरु भएको यू-१९ विश्वकपमा नेपालले २००० मा डेब्यू गरेको थियो । नेपालले २००० देखि २०१६ सम्म ७ पटक यू१९ विश्वकप खेलेको थियो । नेपालले २००० देखि ८ सम्म पाँच संस्करण विश्वकप लगातार खेलेको थियो । त्यसपछि २०१२ र २०१६ मा यू-१९ विश्वकप खेलेको थियो ।

सन् २००६ मा न्युजिल्यान्डलाई हराउँदै प्लेट च्याम्पिन नै बनेको थियो । २००८ मा प्लेट च्याम्पियनसिपको फाइनलमा वेस्टइन्डिजसँग पराजित भएको थियो । नेपालले २०१६ पछि यू१९ विश्वकप खेलेको छैन । नेपालको लक्ष्य २०१६ पछि पहिलो पटक विश्वकप खेल्नेछ ।

यता युएईले तीन पटक यू-१९ विश्वकप खेलेको छ । २०१४ मा युएईले यू-१९ विश्वकप आयोजना गर्दै घरेलु टोलीको नाताले खेलेको थियो । त्यसपछि २०२० र २०२२ मा यू-१९ विश्वकप खेलेको थियो ।