दुबई (हाम्रो खेलकुद) – तीव्र गतिका बलर चाद सोफरको सानदार बलिङको सहयोगमा पपुवा न्युगिनीले आइसिसी विश्वकप लिग-२ त्रिकोणात्मक ओडिआई सिरिजमा घरेलु टोली युएईमाथि १ सय ३१ रनको सानदार जित हात पारेको छ । लिग–२ मा यो पपुवा न्युगिनीको ३० औं खेलमा यो मात्रै तेस्रो जित हो । तीन मध्य दुई जित युएईविरुद्ध रहेको छ।

जितको लागि २ सय ६३ रनको विजयी लक्ष्य पछ्याएको युएई ३४.२ ओभरमा १ सय ३१ रनमा अल आउट भयो । युएईका ओपनर मोहम्मद वासिमले १७ बलमा ४ चौकासहित सर्वाधिक २४ रन बनाए । युएईका कुनैपनि ब्याटरले राम्रो प्रदर्शन गर्न सकेनन् ।

तीव्र गतिका बलर काबुवा मोरेआले ओपनर अर्यान लर्कानलाई ५ रनमा क्याच आउट गराए । त्यसपछि तीव्र गतिका बलर चाद सोफरले मध्यक्रम धरासयी बनाएका थिए । सोफरले युएईका प्रमुख ब्याटर मोहम्मद वासिमलाई १७ बलमा ४ चौकासहित २४ रनमा बोल्ड आउट गरे । कप्तान सिपी रिजवान पनि एक रनमा सोफरको बलमा बोल्ड आउट भए ।

सोफरकै बलमा रोहन मुस्तफा तीन रनमा टोनी उराबाट क्याच आउट भएपछि युएई ९.४ ओभरमा ४८–४ को दयनीय अवस्थामा पुगेको हो । युएईका प्रमुख ब्याटर वृत्य अरविन्द ३६ बलमा १ चौकासहित २३ रनमा रन आउट भए । आसिफ खानसँग तालमेल नमिल्दा वृत्य रन आउट भएका थिए । वृत्यको रन आउटपछि युएईको जितको आशा टाढिएको थियो । असाद भालाले आसिफ खानलाई २० रनमा बाल्ड आउट गरे ।

सोफरले एलिशान शराफुलाई १४ र कार्तिम मयाप्पनलाई ८ रनमा क्याच आउट गर्दै करिअरमा दोस्रो पटक पाँच विकेट पूरा गरेका थिए । पपुवा न्युगिनीका चाद सोफरले १० ओभरमा १ मेडनसहित २५ रन खर्चेर ५ विकेट लिए ।

त्यसअघि दुबई इन्टरनेशल क्रिकेट स्टेडियममा टस हारेर पहिला ब्याटिङ थालेको पपुवा न्युगिनी ४९.१ ओभरमा २ सय ६२ रनमा अल आउट भएको थियो । पपुवा न्युगिनीको जितमा मध्यक्रमका ब्याटर सेसे बाउले ७६ बलमा ५ चौका र १ छक्कासहित सर्वाधिक ७४ रनको योगदान दिए ।

ओपनर टोनी उराले ४३ बलमा ८ चौका र १ छक्कासहित ५१ रनको योगदान दिए । पहिलो विकेटका लागि उरा र किप्लिङ डोरिगाले १४ ओभरमा ८१ रनको सानदार साझेदारी गरेका थिए ।

डोरिगा ६९ बलमा ४ चौका र १ छक्कासहित ४२, असाद भाला २३ र गौडी टोका २८ रनमा आउट भए । एक समय विशाल योगफलको आधार देखाएपनि मध्यक्रमका ब्याटर नचल्दा प्रतिस्पर्धात्मक योगफलमै रोकिएको थियो ।

युएईका स्पिनर कार्तिक मयाप्पनले १० ओभरमा १ मेडनसहित ४९ रन खर्चेर ४ विकेट लिएपनि जितको लागि पर्याप्त रहेन । अर्यान लर्कानले तीन र जहुर खानले दुई विकेट लिए ।

पपुवा न्युगिनीले अव शुक्रबार नेपालसँग खेल्नेछ । पपुवा न्युगिनी ३० खेलमा ३ मा जित र २६ मा हारसहित ७ अंकका साथ पुछारका छ । पपुवा न्युगिनी पुछारमा रहँदै क्वालिफायर प्लेअफ खेल्ने पक्का भएको छ । पपुवा न्युगिनीले २०२२ सेप्टेम्बरमा अमेरिकालाई उसकै मैदानमा २६ रनले हराएको थियो । २०२२ मार्चमा युएईलाई पनि उसकै घरेलु मैदानमा ६ विकेटले हराउँदै पहिलो जित हात पारेको थियो ।

अंक तालिका

स्कटल्यान्ड ३६ खेलमा २४ मा जित र १० मा हारका साथ ५० अंकका साथ शीर्ष स्थानमा रहँदै अन्त्य गर्यो । ओमान ३६ खेलमा २१ मा जित र १३ मा हारसहित ४४ अंकका साथ दोस्रो अन्त्य गरेको छ । नामिबिया ३६ खेलमा १९ मा जित र १६ मा हारका साथ ३९ अंकका साथ तेस्रो स्थानमा छ ।

अमेरिका ३६ खेलमा १६ मा जित र १७ मा हारसहित ३५ अंकका साथ चौथो स्थानमा छ । युएई २९ खेलमा १३ मा जित र १३ मा हारसहित २९ अंकका साथ पाँचौं स्थानमा छ । नेपाल २९ खेलमा १३ मा जित र १४ मा हारसहित २८ अंकका साथ छैटौं स्थानमा छ । पपुवा न्युगिनी ३० खेलमा ३ मा जित र २६ मा हारसहित ७ अंक जोड्दै पुछारमा छ।