दुबई (हाम्रो खेलकुद) – नेपालका यू–१९ क्रिकेट टोलीका मुख्य प्रशिक्षक जगत टमाटाले विश्वकपमा पुगेर सबै नेपालीको अनुहार खुसी बनाउन चाहेको बताएका छन् । आइसिसी यू–१९ विश्वकप एसिया क्षेत्र छनोटमा लगातार चार जितपछि टमाटाले उक्त प्रतिक्रिया दिएका हुन् ।

नेपालले बिहीबार युएईलाई हराउन सके २०२४ मा श्रीलंकामा हुने यू१९ विश्वकप खेल्न पाउनेछ । ‘समग्रमा केटाहरुको प्रदर्शन राम्रो चलि राखेको छ । एक एक खेल जित्दै गएका छौं । केटाहरुले मैदानको बारे जानी पनि सकेको छ । २०१६ पछि इतिहास लेख्न एक खेल पछाडि छौं । त्यसैको प्रतिक्षा गरेका छौं,’ मुख्य प्रशिक्षक जगत टमाटाले भने ।

टमाटा मुख्य प्रशिक्षक हुँदा नै नेपालले २०१६ मा बंगलादेशमा भएको यू१९ विश्वकप खेलेको थियो । त्यसपछि नेपालले तीन विश्वकप गुमाएको छ । २०१७ को छनोटमा अफगानिस्तान र २०१९ मा युएईसँग पराजित हुँदै दुई विश्वकप गुमाएको थियो ।

‘अव एउटा खेल हो । सब भन्दा पहिला त केटाहरुले जुन हिसाबले खेलेको छ त्यहिँ हिसाबले भोली खेल्दिन पर्यो । २०१६ पछि विश्वकप खेलेका थिएनौं । जुन मिहिनेत गरेका थियौं त्यसको फल निकालि राखेका छन्’, उनले भने ।

नेपाली यू१९ टोलीले युएई आनु अघि टियु क्रिकेट मैदानमा सिनियर टोलीसँग चार अभ्यास खेल खेलेको थियो । सिनियर खेलाडीहरुसँग अभ्यास गर्दा फाइदा मिलेको टमाटा बताउँछन् ।

‘सबभन्दा हाम्रा केटाहरुलाई सिनियर केटाहरुले अभ्यास दियो । त्यसको नतिजा हो । किनभने खेल खेल्न हामी बाहिर गएनौं । हाम्रो सिनियर खेलाडीसँग केहि नभएपनि ७-८ वटा खेल खेलेका छौं । त्यो त्यसको फल पनि हो । केटाहरुमा खेल्न सक्ने क्षमता छ । विशेष त म अर्जुनको कुरा गर्छु । अर्जुन भनेको हाम्रो क्रिकेटको भविष्य हो’, उनले भने ।

नेपालले २०१९ मा युएईसँग एक रनले हार्दा दुई विश्वकप खेल्न पाएन । नेपालको लक्ष्य उक्त एक रनको हारको बदला लिँदै विश्वकप खेल्ने हुनेछ । टमाटा देशमा खुसी दिलाउने बताउँछन् ।

‘अव पिडा भन्दा पनि देशमा एउटा खुसी दिलाउने हो । गएको कुरालाई बिर्सिउ । हो त्यो के हो भन्ने भित्र जिनमै छ । क्वालिफायर गरेर सबै नेपालीलाई अनुहारमा खुसी हेर्न चाहन्छौं’, उनले भने ।

पछिल्लो समय सिनियर टोलीले पनि सानदार प्रदर्शन गर्दै आएको छ । नेपालको सिनियर टोलीले एकपछि अर्को खेल जित्दा पनि यु१९ टोलीलाई फाइदा भएको टमाटा बताउँछन् ।

‘सिनियर टोलीको नतिजाले एकदमै फाइदा भएको छ । किनभने सिनियर टोलीले चार खेलको क्लिनस्विप गरेको छ नि त्यसले गर्दा पनि खेलाडीमा मनोबल बढेको छ । उनीहरुले गर्न सक्छ भने हामीले किन सक्दैनौं त । अव हामी एक खेल पछाडि छौं’, उनले भने ।