एजेन्सी – अष्ट्रेलियाले तेस्रो टेस्ट खेलमा सानदार बलिङ प्रदर्शन गरेपछि घरेलु टोली भारतविरुद्ध अग्रता लिएको छ । पहिलो दिनको खेल सकिँदा अष्ट्रेलिया १५६–४ को अवस्थामा छ।

अष्ट्रेलियाका पिटर ह्यान्डकम्ब ७ र क्यामरन ग्रीन ६ रनमा अविजित छन् । अष्ट्रेलियाले पहिलो इनिङमा ४७ रनको अग्रता लिएको छ । अष्ट्रेलियाका ओपनर उस्मान खवाजाले १ सय ४७ बलमा ४ चौकासहित सर्वाधिक ६० रनको योगदान दिए ।

स्पिनर रविन्द्र जडेजाले ओपनर ट्रविस हेडलाई ९ रनमै एलबीडब्लू आउट गरेका थिए । दोस्रो विकेटका लागि मार्नस लाबुसेन र उस्मान खवाजाले ९६ रनको साझेदारी गर्दै बलियो योगफलको सम्भावना देखाएका थिए ।

लाबुसेन ९१ बलमा १ चौकासहित ३१ रनमा जडेजाको बलमा बोल्ड भए । जडेजाले नै कप्तान स्टिभ स्मिथलाई ३८ बलमा ४ चौकासहित २६ रनमा क्याच आउट गराए । पहिलो दिन भारतको सवै विकेट जडेजाले लिएका थिए ।

त्यसअघि होल्कर क्रिकेट स्टेडियम इन्डोरमा टस जितेर पहिला ब्याटिङ रोजेको भारत ३३.२ ओभरमा १ सय ९ रनमा अल आउट भएको थियो । भारतका विराट कोहलीले ५२ बलमा २ चौकासहित सर्वाधिक २२ रन बनाउन सके ।

छैटौं ओभरको अन्तिम बलमा म्याथ्यु कुह्नेमानले कप्तान रोहित शर्मालाई १२ रनमा विकेटकिपर एलेक्स केरीबाट स्टम्पिङ आउट गर्दै पहिलो सफलता दिलाएका थिए । त्यसपछि भारतले लगातार एकपछि अर्को विकेट गुमाएको थियो ।

रोहितले २३ बलमा ३ चौका हाने । अर्का ओपनर शुभमन गिल १८ बलमा ३ चौकासहित २१ रनमा उनकै बलमा कप्तान स्टिभ स्मिथबाट क्याच आउट भए ।

नाथन लायनले चेतेश्वर पुजारालाई एक रनमा बोल्ड गरे । रविन्द्र जडेजा ४ र श्रेयस ऐर शून्यमा आउट भएपछि भारत ४५(५ को संकट अवस्थामा पुगेको थियो ।

विराट कोहली र केएस भरतले ३५ रनको साझेदारी गरेका थिए । भरत १७, रविचन्द्रन आश्विन ३ र उमेश यादव १७ रनमा आउट भए । अक्षर पटेल १२ रनमा अविजित रहे । अष्ट्रेलियाका म्याथ्यु कुह्नेमानले ९ ओभरमा २ मेडनसहित १६ रन खर्चेर ५ विकेट लिए । नाथान लायनले ३ र टोड मर्फीले एक विकेट लिए । मोहम्मद शिराज भने रन आउट भएका थिए ।