एक समय थियो, नेपालको विश्वकप खेल्ने सपनामा अफगानिस्तान लगातार तगारो बन्ने गर्दथ्यो । सिनियर होस् वा उमेर समूहको क्रिकेट, अन्तिम निर्णायक खेलमा अफगानिस्तान सधैं बाधक बन्दथ्यो । नेपालको कुनैपनि टोलीले अफगास्तिानलाई हराएर कहिल्यै विश्वकप खेल्न सकेन । सधैं नेपालको विश्वकपमा अफगानिस्तान भिलेन बनि रह्यो ।

अफगानिस्तानले २०१८ मा टेस्ट मान्यता प्राप्त गर्यो । अफगानिस्तानले टेस्ट मान्यता पाएपछि सिधैं विश्वकप खेल्न थालेपछि नेपाललाई युएई बाधक बन्दै आएको छ । गतवर्ष अल अमरेतमा सम्पन्न आइसिसी टि२० विश्वकप क्वालिफायरको सेमिफाइनलमा नेपाल युएईसँग ६८ रनले पराजित हुँदै विश्वकप खेल्न पाएन ।

समूह चरणमा लगातार तीन खेल जितेपनि निर्णायक खेलमा नेपाल युएईसँग पराजित हुँदै अष्ट्रेलियामा हुने टि२० विश्वकप खेल्ने अवसर गुमाएको थियो । गतवर्ष महिला टोली एसिया कपमा पुग्न पनि युएईनै बाधक बन्यो । २०२२ जुन २४ मा मलेसियामा भएको एसिसी वुमन्स टि२० च्याम्पियनसिपको पहिलो सेमिफाइनल खेलमा युएई नेपालविरुद्ध मात्रै ८१ रनमा अल आउट भयो ।

नेपालकी अस्मिना कर्माचार्यले पाँच विकेट लिएकी थिइन् । तर वर्षाको कारण खेल हुन नसकेपछि समूह विजेताको रुपमा युएई फाइनल खेलेको थियो । गतवर्ष यू१९ महिला विश्वकप छनोटमा नेपाल युएईसँग ८ रनमा अल आउट हुँदै लज्जास्पद प्रदर्शन गर्यो । २०१९ को एसिया क्षेत्र छनोटमा नेपाल युएईसँग एक रनले डकवर्थ लेविस पद्धतिको आधारमा नेपाल पराजित हुँदै दुई विश्वकप खेल्न पाएन ।

यी सवै पिडाको बदला नेपाल विहीबार लिने सोचमा हुनेछ । सवै नेपाली समर्थक र शुभचिन्तक पनि त्यहिँ चाहन्छन् । पुन निर्णायक खेलमा निराश हुनु हुँदैन । अरु हार भन्दा एक रनको धेरै पिडादायी हुन्छ । ती सवै पिडा नेपाल अन्त्य गर्न चाहन्छ ।

विहीबार आजमानमा रहेको इडेन गार्डेन ओभलमा आइसिसी यू–१९ विश्वकप एसिया क्षेत्र छनोट अन्तर्गत नेपालले युएईसँग खेल्दैछ । खेल नेपाली समय अनुसार १०ः ४५ मा हुनेछ । नेपालले सुरुवाती सबै चार खेलमा सहज जित हात पारेको छ । नेपाली टोलीको असली परिक्षा हुनेछ । युएई पनि चार खेलमा अपराजित छ ।

नेपालले सिंगापुरलाई ९६, कुवेतलाई २ सय ४३, हङकङलाई ९ विकेट र मलेसियालाई १० विकेटले हराएको थियो । घरेलु टोली युएईले मलेसियालाई ७ विकेट, हङकङलाई १ सय ६३ रन, सिंगापुर र कुवेतलाई ८–८ विकेटले हराएको थियो । नेपालको ब्याटिङ र बलिङ दुवै राम्रो छ । यस प्रतियोगितामा शतक प्रहार गर्ने नेपाली खेलाडी मात्रै हुन् ।

कुवेतविरुद्ध नेपालका अर्जुन साउदले १ सय ८ र देव खनालले १ सय २५ रनको सानदार शतकीय इनिङ खेलेका थिए । आकाश त्रिपाठीले दुई र विशाल विक्रम केसीले एक अर्धशतक प्रहार गरेका छन् । तीव्र गतिका बलर आकाश चन्द ११, हेमन्त धामी र दीपेश कँडेलले ७-७ विकेट लिँदै प्रतियोगितामा सानदार प्रदर्शन गरेका छन् ।

स्पिनर सुवास भण्डारीको प्रदर्शन पनि त्यतिनै राम्रो छ । एपिएफबाट घरेलु क्रिकेट खेल्ने दीपक बोहरा ठूलो आशा गरेका खेलाडी हुन् । युएईविरुद्ध सानदार प्रदर्शन गर्दै विश्वकप सपना साकार पार्न महत्वपूर्ण योगदान दिनसक्छन् । मलेसियाविरुद्ध ३८ रनको आक्रामक इनिङ खेल्दै मनोबल उच्च बनाएका छन् ।

युएईका दुई खेलाडीबाट नेपाल सचेत हुनुपर्छ । युएईका कप्तान आयन खान अनुभवी खेलाडी हुन् । सिनियर टोलीबाट खेलेका आयन स्पिन बलिङसँगै राम्रो ब्याटिङ गर्दछन् । पिच स्पिनर सहयोगी छ । युएईबाट गतवर्ष यू–१९ विश्वकप खेलेका ध्रुव पराशरले यस प्रतियोगितामा सानदार अलराउन्ड प्रदर्शन गरेका छन् । उनले प्रतियोगितामा सर्वाधिक १ सय ९२ रन बनाउनुको साथै १० विकेट लिएका छन् ।

युएईका आयन खान सिनियर छाडेर यू-१९ खेलेका छन् । युएईको लागि पनि यू१९ विश्वकप निकै महत्वपूर्ण हुनेछ । नेपाल र युएईबीचको यो प्रतिष्ठाको लडाई समेत हो । गतवर्ष युएईलाई सोझै विश्वकपमा पुर्याउदा अन्तर्राष्ट्रिय क्रिकेट परिषद् (आइसिसी) को चर्को आलोचना समेत भएको थियो ।

त्यसैले दुवै टोली जितका साथ विश्वकपमा स्थान बनाउन चाहन्छन् । नेपाल आठौं र युएई तेस्रो पटक विश्वकप खेल्ने सोचमा हुनेछन् । तुलनात्मक रुपमा नेपाल बलियो देखिएको छ । युएई घरेलु मैदानको फाइदा उठाउन चाहन्छ । नेपाल आफ्नो लय र मनोबललाई निरन्तरता दिन खोज्नेछ ।

मुख्य प्रशिक्षक टमाटा एक रनको हारको बदला भन्दा पनि देशलाई खुशी दिलाउने बताउँछन् । ‘अव पिडा भन्दा पनि यसलाई म कसरी लिएको छु भने देशमा एउटा खुसी दिलाउने हो । गएको कुरालाई बिर्सिने हो । हो भित्र मनमा हुन्छ । विश्वकपमा पुगेर सबै नेपालीको अनुहारमा खुसी हेर्न मन छ’, टमाटाले भने ।

कप्तान देव खनाल इतिहास लेख्न एक कदम टाढा रहेको बताउँछन् । ‘इतिहास लेख्न एक कदम टाढा छौं जस्तो लाग्छ मलाई । युएई र हाम्रो टिम समान छन् । दुवै टोलीमा खासै फरक छैन । युएई र हाम्रो खेलमा जसले उत्कृष्ट क्रिकेट खेल्छ त्यसैले जित्ने हो । सबै खेलाडी विश्वकप नखेलेको ८ वर्ष भयो भनेका छन् । विश्वकप खेल्ने ठुलै सपना छ । आशा गरौं उत्कृष्ट खेल्ने छौं’, देवले भने ।