दुबई (हाम्रो खेलकुद) – नेपाल आइसिसी विश्वकप लिग २ त्रिकोणात्मक ओडिआई सिरिजमा घरेलु टोली युएईसँग ६८ रनको फराकिलो अन्तरले पराजित भएको छ । यो हारसँगै नेपालको शीर्ष तीनमा रहँदै सोझै विश्वकप खेल्ने सम्भावना निकै कठिन बनेको छ ।

जितको लागि २ सय ८ रनको विजयी लक्ष्य पछ्याएको नेपाल ३१.५ ओभरमा १ सय ३९ रनमा अल आउट भयो । नेपालका कुशल मल्लले ५३ बलमा ९ चौका र १ छक्कासहित सर्वाधिक ६० रन बनाए । खराब ब्याटिङ गर्नेक्रममा नेपालका ८ खेलाडीले दोहोरो अंकमा रन बनाउन सकेनन् ।

पहिलो विकेटका लागि आसिफ शेख र कुशल भुर्तेलले १.२ ओभरमा १२ रनको साझेदारी गरेका थिए । कुशल भुर्तेल सबिर अलीको बलमा मोहम्मद वासिमबाट ५ रनमा क्याच आउट भए । तीव्र गतिका बलर जुनैद सिद्दिकले तेस्रो ओभरको तेस्रो बलमा विकेटकिपर वृत्य अरविन्दबाट शून्यमा क्याच गराए । एक बलपछि कप्तान रोहित पौडेल बोल्ड आउट हुन पुगेपछि नेपाल १७(३ को अवस्थामा पुगेको थियो ।

त्यसपछि नेपालले लगातार विकेट गुमायो । आरिफ शेख डक, दीपेन्द्रसिंह ऐरी ७, गुलशन झा र सोमपाल कामी ४(४ रनमा आउट भए । सन्दीप लामिछाने २४ बलमा ४ चौकासहित २६ रनमा अविजित रहे । आसिफ शेख १६ बलमा ३ चौकासहित १७ रनमा आउट भए।

युएईका रोहन मुस्तफाले १० ओभरमा २ मेडनसहित ३१ रन खर्चेर ३ विकेट लिए । कार्तिक मयाप्पनले ८.५ ओभरमा १ मेडनसहित २६ रन खर्चेर ३ विकेट लिए । जुनैद सिद्दिकले २ र सबिर अलि राओले एक विकेट लिए ।

त्यसअघि दुबई इन्टरनेशल क्रिकेट स्टेडियममा टस हारेर पहिला ब्याटिङको निम्तो पाएको युएईले निर्धारित ५० ओभरमा ८ विकेट गुमाउँदै २ सय ७ रन बनाएको थियो । युएईको जितमा ओपनर आसिफ खानले ९९ बलमा ५ चौका र ३ छक्कासहित सर्वाधिक ७२ रनको योगदान दिए ।

रोहन मुस्तफा ७६ बलमा २ चौकासहित ५२ रनमा अविजित रहँदै अलराउन्ड प्रदर्शन गरे । तीव्र गतिका बलर करण केसीले पहिलो ओभरको पाँचौं बलमा ओपनर मोहम्मद वासिमलाई शून्यमा बोल्ड आउट गरेका थिए ।

दोस्रो विकेटका लागि वृत्य अरविन्द र आसिफले ४६ रनको साझेदारी गरेका थिए । वृत्य सन्दीपको बलमा १८ रनमा कुशल भुर्तेलबाट क्याच आउट हुन पुगेका थिए । कप्तान सिपी रिजवान ४० बलमा १ चौकासहित २२ रनमा आउट भए । मुस्तफा र आसिफले चौथो विकेटका लागि ५० रनको साझेदारी गरेका थिए । आर्यन लर्कान २८ रनमा आउट भए ।

नेपालका सन्दीप लामिछानेले १० ओभरमा २७ रन खर्चेर ३ विकेट लिए । करण केसी, आरिफ शेख र कुशल मल्लले एक एक विकेट लिए । नेपालले अव शीर्ष तीनमा रहँदै सोझै एकदिवसीय विश्वकप छनोट खेल्न बाँकी सबै ६ खेल जित्नुपर्ने हुन्छ ।

शीर्ष पाँचमा रहँदै सोझै ओडिआई मान्यता जोगाउन नेपालले अव ४ खेल जित्नुपर्ने हुन्छ । नेपालले शुक्रबार पपुवा न्युगिनी र ६ मार्चमा युएईसँग खेल्नेछ । त्यसपछि घरेलु मैदानमा यी दुई टोलीसँग सिरिज खेल्नेछ ।