दुबई (हाम्रो खेलकुद) – नेपालका कप्तान रोहित पौडेल र मुख्य प्रशिक्षक मोन्टी देशाई युएईसँग खेल्नुअघि दुबई इन्टरनेशल क्रिकेट स्टेडियम आउने बितिक्कै सिधै पहिला पिच निरिक्षण गरेका छन् ।

रंगशाला छिरेपछि कप्तान र प्रशिक्षक सिधै पिच परिक्षण गरेका थिए । केहि समय पिच निरिक्षण गरेपछि मात्रै कप्तान र प्रशिक्षक ड्रेसिङ रुममा छिरेका थिए । पिचलाई हेरेपछि मात्रै नेपालले आफ्नो प्लेइङ ११ निर्धारण गर्नेछ ।

नेपालले टोलीमा आज एक खेलाडी परिवर्तन गर्ने पक्का छ । ओपनर कुशल भुर्तेल चोटका कारण टोलीमा नहुँदा कसलाई मौका दिन्छन् भन्ने कौतहलता छ ।

ब्याटर थप्नु परेमा सन्दीप जोरा विकल्पमा छन् । बलरमा तीव्र गतिका बलरमा प्रतिश जि.सी र गुलशन झा विकल्पमा छन् । स्पिनरमा ललित नारायण राजवंशी छन् । अहिले मैदानमा नेपाल र युएई दुवै टोलीले वार्मअप थालेका छन् । केहि समयमा टस हुनेछ । खेल भने नेपाली समय अनुसार ११ : ४५ मा सुरु हुनेछ ।

युएई ३१ खेलमा १४ मा जित र १४ मा हारसहित ३१ अंकका साथ पाँचौं स्थानमा छ । नेपाल ३१ खेलमा १४ मा जित र १५ मा हारसहित ३० अंकका साथ छैटौं स्थानमा छ । शीर्ष तीनमा पर्दै सोझै विश्वकप छनोट खेल्ने आशा कायमै राख्न नेपालले घरेलु टोली युएईलाई हराउनै पर्ने हुन्छ। नेपालको लागि युएईससँगको खेल निकै महत्वपूर्ण छ ।

तर लिग(२ मा नेपालले युएईलाई हालसम्म पराजित गरेको छैन । लिग-२ मा नेपाल र युएईबीच तीन खेल हुँदा सबै खेलमा घरेलु टोली युएई विजयी भएको छ। नेपालाई शीर्ष पाँचमा रहँदै सोझै ओडिआई मान्यता बचाउन तीन खेल जित्नुपर्ने हुन्छ ।

युएईलाई पनि शीर्ष तीनमा रहँदै सोझै विश्वकप छनोट खेल्न नेपाललाई हराउनै पर्ने दबाब छ । युएईलाई ओडिआई मान्यता सोझै जोगाउन तीन जित आवश्यक देखिन्छ । नेपाल पहिलो खेलमा युएईसँग ६८ रनले पराजित भएको थियो । जितको लागि २ सय ८ रनको विजयी लक्ष्य पछ्याएको नेपाल १ सय ३९ रनमा अल आउट भएको थियो ।

तर युएई पुछारमा रहेको पपुवा न्युगिनीसँग मात्रै ९७ रनमा अल आउट भएको थियो । पहिलो खेलमा युएई पपुवा न्युगिनीसँग १ सय ३१ रनले पराजित भएको थियो । पपुवा न्युगिनीले युएईलाई हराएको हुँदा नेपालको मनोबल उच्च छ ।