दुबई (हाम्रो खेलकुद) – नेपालका मध्यक्रमका युवा ब्याटर भीम सार्कीले आइसिसी विश्वकप लिग-२ त्रिकोणात्मक ओडिआई सिरिजमा घरेलु टोली युएईविरुद्ध आफ्नो करिअरको पहिलो अर्धशतक प्रहार गरेका छन् ।

दुबई इन्टरनेशनल क्रिकेट स्टेडियममा टस जितेर पहिला ब्याटिङ रोजेको नेपालले ३९.३ ओभरमा ६ विकेट गुमाउँदै १ सय ५९ रन बनाएको छ । नेपालका भीम सार्की ७८ बलमा ५ चौकासहित ५३ रनमा अविजित छन् ।

भीमको यो सिनियर टोलीमा पहिलो अर्धशतक हो । उनले ७८ बलमा आफ्नो सिनियर टोलीबाट कुनैपनि खेलमा पहिलो अर्धशतक पूरा गरे । भीमले जहुर खानलार्य थर्डम्यानमा चौका हान्दै अर्धशतक पूरा गरेका थिए । आरिफ शेख १९ रनमा क्रिजमा छन् ।

एक समय १७.१ ओभरमा ६८–५ को अवस्थामा पुगेको नेपाललाई सन्दीप लामिछाने र भीम सार्कीले छैटौं विकेटका ५६ रनको महत्वपूर्ण साझेदारी गरे । सन्दीप ४० बलमा १ चौकासहित २७ रनमा आउट भए । तीव्र गतिका बलर जुनैद सिद्दिकको पाँचौं ओभरको दोस्रो बलमा आसिफ शेख सट लेगमा आयन खानले उत्कृष्ट क्याच लिएपछि ६ रनमा पेभिलिएन फर्केका थिए ।

ज्ञानेन्द्र मल्ल जुनैदको नवौं ओभरको अन्तिम बलमा ११ रनमा एलबीडब्लू आउट भए । २६ बल खेलेका ज्ञानेन्द्रले २ चौका प्रहार गरे । कप्तान रोहित पौडेल स्पिनर आयन लर्कानको १२ औं ओभरको दोस्रो बलमा एक रनमा बोल्ड भएपछि नेपाल समस्यामा परेको थियो । रोहन मुस्तफाले १५ औं ओभरको पहिलो बलमा कुशल मल्ललाई ३२ रनमा बोल्ड आउट गरे ।

ठूलो सट खेलेका कुशललाई मुस्तफाले अनुभवको फाइदा उठाउँदै स्वलो बलमा बोल्ड गरेका थिए । कुशलले ३२ बलमा ४ चौका र २ छक्का प्रहार गरे ।

लर्कानको १८ औं ओभरको पहिलो बलमा दीपेन्द्रसिंह ऐरी एलबीडब्लू आउट भएपछि नेपाल ६८–५ को अवस्थामा पुगेको थियो । त्यसपछि नेपालले सन्दीपलाई ब्याटिङमा पठाएको थियो ।