एजेन्सी – अन्तर्राष्ट्रिय क्रिकेट परिषद् (आइसिसी) को नयाँ ओडिआई वरियतामा नेपालले सुधार गरेको छ । आइसिसीले बुधबार सार्वजनिक गरेको वरियतामा नेपालले दुई स्थान सुधार गर्दै १७ औं स्थानमा उक्लिएको छ ।

नेपाल यसअघि १९ औं स्थानमा थियो । अमेरिका र युएईलाई पछि पार्दै नेपाल १७ औं स्थानमा उक्लिएको छ । नेपाल भन्दा पछि अमेरिका १८ औं, युएई १९ औं र पपुवा न्युगिनी २० औं स्थानमा छन् । नेपाल भन्दा अघि नामिबिया १६ औं, ओमान १५ औं, नेदरल्यान्ड्स १४ औं, जिम्बावे १३ औं र स्कटल्यान्ड १२ औं स्थानमा छ ।

भारत शीर्ष, अष्टेलिया दोस्रो, न्युजिल्यान्ड तेस्रो र इंग्ल्यान्ड चौथो स्थानमा छ । टि२० आई वरियतामा भने नेपाल १६ औं स्थानमा यथावत छ ।

नेपालले आइसिसी विश्वकप लिग-२ त्रिकोणात्मक ओडिआई सिरिजमा पछिल्ला ८ मध्य ७ खेलमा जित हात पारेपछि वरियतामा सुधार गरेको हो । ब्याटिङतर्फ ओडिआई वरियतामा आसिफ शेख ७८ औं र रोहित पौडेल ५९ औं स्थानमा छन् । बलिङतर्फ सन्दीप लामिछाने २७ औं, सोमपाल कामी ६७ औं, दीपेन्द्रसिंह ऐरी ७४ औं र करण केसी ९१ औं स्थानमा छन् ।

नेपालले आइसिसी विश्वकप लिग २ त्रिकोणात्मक ओडिआई सिरिज अन्तर्गत बिहीबार पपुवा न्युगिनीसँग खेल्दैछ । शनिबार युएई, आइतबार पपुवा न्युगिनी र बिहीबार युएईसँग खेल्नेछ ।

नेपाल ३२ खेलमा १५ मा जित र १५ मा हारसहित ३२ अंकका साथ पाँचौं स्थानमा छ । शीर्ष तीनमा रहँदै सोझै विश्वकप छनोट खेल्न नेपालले सबै खेल जित्नुपर्ने हुन्छ । ओडिआई मान्यता जोगाउन नेपालले बाँकी चार मध्य दुई खेल जित्नुपर्ने हुन्छ ।