काठमाडौं (हाम्रो खेलकुद) – नेपालका ओपनर आसिफ शेख आइसिसी विश्वकप लिग-२ त्रिकोणात्मक ओडिआई सिरिजमा पपुवा न्युगिनीविरुद्ध प्लेयर अफ द म्याच चुनिएका छन् । नेपाललाई ५२ रनको जित दिलाउन ओपनर आसिफ शेखले १ सय १० बलमा १२ चौका र २ छक्कासहित १ सय १० रनको सानदार शतकीय इनिङ खेलेका थिए ।

आसिफको शतकको सहयोगमा नेपालले टियु क्रिकेट मैदानमा टस हारेर पहिला ब्याटिङ गर्दै ४९.१ ओभरमा २ सय ९७ रनमा अल आउट भएको थियो । आसिफले १ सय बलमा आफ्नो अन्तर्राष्ट्रिय क्रिकेट करिअरको पहिलो शतक पूरा गरेका थिए । यसै खेलमा सुरुवाती ९० रन जोड्दै आफ्नो ओडिआई करिअरको एक हजार रन पूरा गरेका थिए ।

आसिफको यो ओडिआई क्रिकेटमा पाँचौं प्लेयर अफ द म्याच अवार्ड हो । आसिफ ओडिआईमा पहिलो पटक प्लेयर अफ द म्याच २०२२ जुलाईमा स्कटल्यान्डलाई हराउन ७१ रनको इनिङ खेल्दा चुनिएका थिए । उक्त खेल नेपालले आफ्नो इतिहासमा पहिलो पटक स्कटल्यान्डलाई हराएको थियो ।

अघिल्लो साता पिएनजीलाई हराउन दुबईमा आसिफले १ सय ३० बलमा २ चौका र १ छक्कासहित ८६ रनको परिपक्क इनिङ खेल्दै प्लेयर अफ द म्याच चुनिएका थिए । एक समय १०५-७ को अवस्थाबाट आसिफले सन्दीपसँग ७७ रनको साझेदारी गर्दै जित दिलाएका थिए ।

दुई साताअघि नामिबियालाई हराउन घरेलु मैदान टियुमा आसिफले ८१ रन जोड्दै प्लेयर अफ द म्याच चुनिएका थिए । गत वर्ष युएईसँगको तेस्रो ओडिआई खेलमा ८८ रन बनाउँदै प्लेयर अफ द म्याच जितेका थिए ।

जितको लागि २ सय ९८ रनको विजयी लक्ष्य पछ्याएको पपुवा न्युगिनी ४७.१ ओभरमा २ सय ४५ रनमा अल आउट भयो । नेपाल ३३ खेलमा १६ मा जित र १५ मा हारसहित ३४ अंकका साथ पाँचौं स्थानमा छ ।

नेपालले अव आइतबार युएई, सोमबार पपुवा न्युगिनी र बिहीबार युएईसँग खेल्नेछ । नेपाल शीर्ष तीनमा रहँदै आगमी जुन जुलाईमा जिम्बावेमा हुने एकदिवसीय विश्वकप छनोट सोझै खेल्न बाँकी तीनै खेल जित्नुपर्ने हुन्छ । एक खेल हारेको खण्डमा नेपालले क्वालिफायर प्लेअफ खेल्नुपर्ने हुन्छ । ओडिआई मान्यता सोझै जोगाउन नेपालले अव तीन मध्य एक खेल जित्नुपर्ने हुन्छ ।