एजेन्सी – साविक टि२० विश्वकप विजेता इंग्ल्यान्ड पहिलो टि२० आई खेलमा घरेलु टोली बंगलादेशसँग ६ विकेटले पराजित भएको छ । योसँगै घरेलु टोली बंगलादेशले तीन टि२० आई खेलको सिरिजमा १–० को अग्रता लिएको छ।

जितको लागि १ सय ५७ रनको विजयी लक्ष्य पछ्याएको बंगलादेशले १८ ओभरमा ४ विकेट गुमाउँदै पूरा गर्यो । बंगलादेशका नाज्मुल हसन सान्टोले ३० बलमा ८ चौकासहित सर्वाधिक ५१ रनको इनिङ खेले ।

सकिब अल हसन २४ बलमा ६ चौकासहित ३४, लिटन दास १२ र रोनी तलुकदारले २१ रनमा आउट भए । इंग्ल्यान्डका जोफ्रा आर्चर, आदिल राशिद, मार्क वुड र मोईन अलीले एक एक विकेट लिए ।

जहुर अहमद चौधरी स्टेडियममा टस हारेर पहिला ब्याटिङको निम्तो पाएको इंग्ल्यान्डले निर्धारित २० ओभरमा ६ विकेट गुमाउँदै १ सय ५६ रन बनायो । ओपनर जस बटलरले ४२ बलमा ४ चौका र ४ छक्कासहित सर्वाधिक ६७ रनको योगदान दिए । ओपनर फिलिप साल्ट ३५ बलमा ४ चौका र १ छक्कासहित ३८ रनमा आउट भए ।

पहिलो विकेटका लागि जस बटलर र फिलिप साल्टले १० ओभरमा ८० रनको साझेदारी गर्दै राम्रो सुरुवात दिलाएका थिए । तर मध्यक्रम चल्न नसक्दा विशाल योगफल बनाउनबाट चुकेको थियो ।

डेविड मलान ४, बेन डकेट २०, मोईन अली ८ र साम करन ६ रन बनाए । बंगलादेशका हसन मोहम्मदले ४ ओभरमा २६ रन खर्चेर २ विकेट लिए । नसुम अहमद, तस्किन अहमद, मुस्ताफिजुर रहमान र सकिब अल हसनले एक एक विकेट लिए । दोस्रो खेल आइतबार र तेस्रो खेल मंगलबार हुनेछ ।