काठमाडौं (हाम्रो खेलकुद) – सेसे बाउसहित तीन ब्याटरको अर्धशतकमा पपुवा न्युगिनीले आइसिसी विश्वकप लिग–२ त्रिकोणात्मक ओडिआई सिरिजमा युनाटेड अरव इमिरेट्स (युएई) लाई २ सय ४७ रनको प्रतिस्पर्धात्मक लक्ष्य दिएको छ।

टियु क्रिकेट मैदानमा टस हारेर पहिला ब्याटिङको निम्तो पाएको पिएनजीले निर्धारित ५० ओभरमा ९ विकेट गुमाउँदै २ सय ४६ रन बनायो । पिएनजीका सेसे बाउ १ सय ६ बलमा १० चौकासहित सर्वाधिक ८१ रनमा अविजित रहे ।

ओपनर हिरि हिरि ८५ बलमा ५ चौका र ४ छक्कासहित ७७ रनमा बोल्ड आउट भए । करिअरको उत्कृष्ट प्रदर्शन गरेका हिरि आयन खानको बलमा बोल्ड आउट हुन पुगे । यसअघि तल्लोक्रममा खेल्ने हिरिलाई पिएनजीले टोनी उराको स्थानमा ओपनिङ गराएको थियो । अभ्यासकोक्रममा खुट्टामा चोट लागेपछि उराको स्थानमा हिरिलाई मैदान उतारेको थियो ।

आयन खानले कप्तान असद भालालाई शून्यमा बोल्ड गर्दै लगातार दुई विकेट लिएका थिए । हिरि आउट हुनुअघि पिएनजी ३१.२ ओभरमा १८४–१ को बलियो अवस्थामा थियो । ३१ औं ओभरको तेस्रो बलमा हिरि र चौथो बलमा असद भालालाई बोल्ड गर्दै आयन खानले युएईलाई खेलमा फर्काए ।

अन्तिम १ सय १२ बलमा पपुवा न्युगिनीले ८ विकेट गुमाउँदै ६२ रन मात्रै जोडेपछि विशाल योगफलबाट चुकेको हो । दोस्रो विकेटका लागि हिरि र सेसे बाउले १ सय १२ रनको कीर्तिमानी शतकीय साझेदारी गरेका थिए । उक्त साझेदारी पिएनजीको ओडिआईमा कुनैपनि विकेटका लागि भएको उच्च साझेदारी हो ।

यसअघि उच्च साझेदारी नेपालविरुद्ध गतवर्ष चौथो विकेटका लागि लेगा सियाका र सेसे बाउले १ सय १० रनको शतकीय साझेदारी गरेका थिए । पिएनजीलाई ओपनर किप्लिङ डोरिगा र हिरिले १०.१ ओभरमा ७२ रनको साझेदारी गर्दै राम्रो सुरुवात दिलाएका थिए । डोरिगा आयन खानको बलमा ५५ रनमा एलबीडब्लू आउट भए ।

डोरिगाले ४४ बलमा ८ चौका र २ छक्का प्रहार गरे । चाल्स अमिनी ४, राइली हेकुरे १ र चाद सोपर १० रनमा आउट भए । नर्मन भानुवा १० रनमा आउट भए ।

युएईका आयन खानले १० ओभरमा १ मेडनसहित ३४ रन खर्चेर ३ विकेट लिए । रोहन मुस्तफाले १० ओभरमा १ मेडनसहित २४ रन खर्चेर १ विकेट लिए । जुनैद सिद्दिकले १० ओभरमा १ मेडनसहित ३९ रन खर्चेर २ विकेट लिए । जहुर खानले दुई र कार्तिक मयाप्पनले एक विकेट लिए ।