एजेन्सी – अष्ट्रेलियाका युवा ब्याटर क्यामरन ग्रीन भारतविरुद्ध चौथो टेस्ट खेलमा उत्कृष्ट शतक प्रहार गर्दै आउट भएका छन् । दोस्रो दिनको खेल चलि रहँदा अष्ट्रेलियाले पहिलो इनिङमा ६ विकेट गुमाउँदै ३ सय ८३ रन बनाएको छ । उस्मान खवाजा ३ सय ९० बलमा २० चौकासहित १ सय ६३ रनमा क्रिजमा छन् ।

क्यामरन ग्रीन १ सय ७० बलमा १८ चौकासहित १ सय १४ रनमा आउट भए । ग्रीनको यो अन्तर्राष्ट्रिय कुनैपनि संरचनाको पहिलो शतक हो । ग्रीन स्पिनर रविचन्द्रन आश्विनको लेग साइडको बलमा स्वीप सट खेल्ने धुनमा विकेटकिपर केएस भरतबाट क्याच आउट भए ।

पाँचौं विकेटका लागि ग्रीन र उस्मान खवाजाले २ सय ८ रनको सानदार दोहोरो शतकीय साझेदारी गरेपछि अष्ट्रेलिया विशाल योगफलतर्फ अघि बढेको छ ।

ओपनर ट्रविस हेड भने ४४ बलमा ७ चौकासहित ३२, कप्तान स्टिभ स्मिथ १ सय ३५ बलमा ३ चौकासहित ३८, मार्नस लाबुसेन ३ र पिटर ह्यान्डस्कम्ब १७ रन बनाए ।

चार टेस्ट खेलको सिरिजमा भारत २–१ ले अघि छ । अष्ट्रेलिया आइसिसी विश्व टेस्ट च्याम्पियनसिप २०२३ को फाइनलमा पुगि सकेको छ । भारतलाई भने फाइनल खेल खेल्न अन्तिम खेलमा जित आवश्यक पर्दछ ।