एजेन्सी – युवा ब्याटर शुभमन गिलको शतकमा भारतले चौथो टेस्ट खेलमा अष्ट्रेलियालाई गतिलो जवाफ फर्काएको छ । तेस्रो दिनको खेल सकिँदा भारत पहिलो इनिङमा २८९–३ को बलियो अवस्थामा छ।

भारत अव १ सय ९१ रनले पछि छ । भारतका युवा ओपनर शुमभन गिलले २ सय ३५ बलमा १२ चौका र १ छक्कासहित १ सय २८ रनको शतकीय इनिङ खेले । गिलको यो टेस्ट करिअरको दोस्रो शतक हो । टेस्ट करिअरको उच्च प्रदर्शन हो ।

भारतका विराट कोहली १ सय २८ बलमा ५ चौकासहित ५९ रनमा क्रिजमा छन् । उनलाई रविन्द्र जडेजाले १६ रनमा साथ दिनेछन् । दोस्रो विकेटका लागि चेतेश्वर पुजारा र शुभमन गिलले १ सय १३ रनको शतकीय साझेदारी गरेका थिए । पुजारा १ सय २१ बलमा ३ चौकासहित ४२ रनमा आउट भए ।

भारतलाई ओपनर रोहित शर्मा र गिलले ७४ रनको साझेदारी गरेका थिए । रोहित ५८ बलमा ३ चौका र १ छक्कासहित ३५ रनमा आउट भए । अष्ट्रेलियाका नाथन लायन, टोड मर्फी र म्याथ्यु कुहनेमानले एक एक विकेट लिए ।

त्यअसघि अष्ट्रेलियाले पहिलो इनिङमा ४ सय ८० रनमा अल आउट भएको थियो । ओपनर उस्मान खवाजाले ४ सय २२ बलमा २१ चौकासहित १ सय ८० रनको सानदार शतकीय इनिङ खेलेका थिए ।

क्यामरन ग्रीन १ सय ७० बलमा १८ चौकासहित १ सय १४ रनमा आउट भए । ग्रीनको यो अन्तर्राष्ट्रिय कुनैपनि संरचनाको पहिलो शतक हो । पाँचौं विकेटका लागि ग्रीन र उस्मान खवाजाले २ सय ८ रनको सानदार दोहोरो शतकीय साझेदारी गरेका थिए ।

ओपनर ट्रविस हेड भने ४४ बलमा ७ चौकासहित ३२, कप्तान स्टिभ स्मिथ १ सय ३५ बलमा ३ चौकासहित ३८, मार्नस लाबुसेन ३ र पिटर ह्यान्डस्कम्ब १७ रन मा आउट भए । टोड मर्फी ६१ बलमा ५ चौकासहित ४१ र नाथन लायन ९६ बलमा ६ चौकासहित ३४ रनमा आउट भए ।

भारतका रविचन्द्रन आश्विनले सर्वाधिक ६ विकेट लिए । मोहम्मद शामीले दुई, रविचन्द्र जडेजा र अक्षर पटेलले एक एक विकेट लिए । चार टेस्ट खेलको सिरिजमा भारत २–१ ले अघि छ ।

अष्ट्रेलिया आइसिसी विश्व टेस्ट च्याम्पियनसिप २०२३ को फाइनलमा पुगि सकेको छ । भारतलाई भने फाइनल खेल खेल्न अन्तिम खेलमा जित आवश्यक पर्दछ।