काठमाडौं (हाम्रो खेलकुद) – युएईले आइसिसी विश्वकप लिग-२ त्रिकोणात्मक ओडिआई सिरिज अन्तर्गत नेपालविरुद्ध पूर्व कप्तान सिपी रिजवानलाई बेन्चमा राखेको छ । टियु क्रिकेट मैदानमा भएको टसमा नेपालका कप्तान रोहित पौडेलले टस जितेर पहिला ब्याटिङ गर्ने निर्णय लिएका छन् ।

युएईले एक र नेपालले टोलीमा दुई परिवर्तन गरेका छन् । युएईले रिजवानलाई बेन्चमा राख्दै अश्वन्त वल्थापालाई डेब्यू दिएको छ । २१ वर्षीय बायाँ हाते विकेटकिपर वल्थापाले यू-१९ क्रिकेट युएईबाट खेलेका छन् । युएईले कप्तानबाट हटाएको दुई खेलपछि रिजवानलाई बेन्चमा राखेको हो ।

युएईले अन्तिम खेलमा घरेलु मैदान दुबईमा नेपालविरुद्ध रिजवानलाई कप्तानबाट हटाउँदै मोहम्मद वासिमलाई नेतृत्व दिएको थियो । रिजवानले पछिल्ला पाँच खेलमा १९, ७, १०, २२ र १ रन मात्रै बनाएका छन् । मध्यक्रम र तल्लोक्रम ब्याटिङ लगातार खराब प्रदर्शनपछि रिजवानलाई बेन्चमा राख्दै वल्थापालाई मौका दिएको हो । वल्थापा नेपाललाई सरप्राइज दिनसक्छन् । उनले यू१९ क्रिकेटमा राम्रो प्रदर्शन गरेका थिए ।

नेपालले ज्ञानेन्द्र मल्ल र करण केसीलाई बेन्चमा राखेको छ । नेपालले गुलशन झा र ललितनारायण राजवंशीलाई मौका दिएको छ । ज्ञानेन्द्र खराब प्रदर्शनका कारण टोलीमा नपरेको हुन सक्छन् । ज्ञानेन्द्रले पछिल्ला ९ इनिङमा क्रमश : ११, ११, ६, ०, ४, २१, ६५, ४ र २२ छ ।

ज्ञानेन्द्रले ६५ रन नामिबियाविरुद्ध टियु मैदानमै दुई साता अघि हानेका थिए । उक्त अर्धशतकपछि राम्रो प्रदर्शन छैन । नेपालले पावर प्लेमा विकेट लिन सकेको छैन । जसको कारण करणलाई बेन्चमा राखेर गुलशनलाई मौका दिएको हुनसक्छ । गुलशन मध्यक्रममा ब्याटिङ पनि गर्दछन् ।

पछिल्ला १० खेल मध्य ७ खेलमा युएई पराजित भएको छ । जसमध्य ५ खेल लक्ष्य पछ्याउँदा हारेको छ । पछिल्लो खेलमा नेपालले युएईलाई पहिला ब्याटिङ गर्दै जितेको थियो । नेपालले दिएको २ सय ३० रनको विजयी लक्ष्य पछ्याएको युएई १ सय ८७ रनमा अल आउट भएको थियो । मध्यक्रममा लगातार खराब ब्याटिङ गर्दै आएको छ । त्यसैको कारण नेपालले टस जितेर पहिला ब्याटिङ गर्ने निर्णय लिएको छ ।

नेपालको प्लेइङ ११ :

आसिफ शेख (विकेटकिपर), कुशल भुर्तेल, गुलशन झ, रोहित पौडेल (कप्तान), कुशल मल्ल, भीम सार्की, आरिफ शेख, दीपेन्द्रसिंह ऐरी, ललित नारायण राजवंशी, सोमपाल कामी र सन्दीप लामिछाने ।

युएईको प्लेइङ ११ :

मोहम्मद वासिम (कप्तान), आयन खान, आर्यन लाक्रा, अश्वन्त वल्थापा (विकेटकिपर), आसिफ खान, जुनैद सिद्धिक, कार्तिक मयाप्पन, रोहन मुस्तफा, वृत्य अरविन्द, जहुर खान र जवार फरिद ।