एजेन्सी – पाकिस्तान सुपर लिग (पिएसएल) मा ३३ छक्कासँगै टि२० इतिहासकै एकै खेलमा सर्वाधिक रन बनेको छ । मुल्तान सुल्तान र क्वेटा ग्ल्याडियटर्सबीचको खेलमा शनिबार राती कुल ५ सय १५ रन बनेको छ । मुल्तान ९ रनले विजयी हुँदा दुवै इनिङमा २ सय ५० रन कटेपछि नयाँ कीर्तिमान बनेको हो ।

टि२० क्रिकेट इतिहासमा पहिलो पटक एकै खेलमा ५ सय १५ रन बनेको हो । मुल्तानले २ सय ६२ र क्वेटाले २ सय ५३ रन बनाएका थिए । यसअघि एकै खेलमा टि२० मा दुई इनिङमा गरि कुल ५ सय १ रन बनेको थियो ।

गतवर्ष सिएसए टि२० च्यालेन्जमा टाइन्टन्स र नाइट्सबीचको खेलमा २ सय ७१ र २ सय ३० गरि कुल ५ सय १ रन बनेको थियो । २०१६ मा सुपर साम्समा ओटागो र सेन्ट्रल डिस्ट्रिकबीचको खेलमा ४ सय ९७ रन बनेको थियो ।

जितको लागि २ सय ६३ रनको विशाल विजयी लक्ष्य पछ्याएको क्वेटाले निर्धारित २० ओभरमा ८ विकेट गुमाउँदै २ सय ५३ रन बनाउन सक्यो । टि२० क्रिकेटमा दोस्रो इनिङमा बनेको यो अहिले सम्मकै उच्च योगफल हो । यसअघि दोस्रो इनिङमा टि२० क्रिकेटमा सुपर साम्समा ओटागोले दिएको २ सय ५० रनको विजयी लक्ष्य पछ्याउनेक्रममा ४ विकेट गुमाउँदै २ सय ४८ रन बनाएको थियो ।

क्वेटाका इफ्तिखर अहमदले ३१ बलमा ४ चौका र ४ छक्कासहित ५३ रनको इनिङ खेले । ओपनर मार्टिन गुप्टिल १४ बलमा २ चौका र ४ छक्कासहित ३७ तथा उमर अकमल १० बलमा २ चौका र ३ छक्कासहित २८ रन जोडे । समग्रमा क्वेटाले १६ र मुल्तानले १७ छक्का प्रहार गरे । दुई टोलीबाट कुल ३३ छक्का एकै खेलमा प्रहार भयो ।

त्यसअघि रावलपिंडी क्रिकेट स्टेडियममा टस हारेर पहिला ब्याटिङको निम्तो पाएको मुल्तानले निर्धारित २० ओभरमा ३ विकेट गुमाउँदै २ सय ६२ रन बनाएको थियो ।

मुल्तानको जितमा उस्मान खानले ४३ बलमा १२ चौका र ९ छक्कासहित १ सय २० रनको विष्फोटक शतकीय इनिङ खेले । उनले ३६ बलमा शतक पूरा गरेका थिए । पिएसएल इतिहासमा यो सर्वाधिक छिटो शतक हो । उनले मात्रै २४ घण्टा अघि मुल्तानकै राइली रोसोउले पेशावार जाल्मीविरुद्ध बनाएको ४१ बलको शतकको कीर्तिमान तोडेका थिए ।

२ सय ६२ रन पिएसएल इतिहासकै उच्च योगफल हो । यसअघि पिएसएलको उच्च योगफल २०२१ मा इस्लामबाद युनाइटेडले पेशावार जाल्मीविरुद्ध २ सय ४७ रन बनाएको थियो । पहिलो विकेटका लागि मोहम्मद रिजवान र उस्मान खानले मात्रै १० ओभरमा १ सय ५७ रनको विष्फोटक शतकीय साझेदारी गरेका थिए । । रिजवान २९ बलमा ६ चौका र २ छक्कासहित ५५ र राइली रोसोउ १५ रनमा आउट भए ।

टिम डेविड २५ बलमा १ चौका र ४ छक्कासहित ४३ रनमा अविजित रहे । काइरन पोलार्ड १४ बलमा २ चौका र १ छक्कासहित २३ रनमा अविजित रहे । क्वेटाका स्पिनर क्विस अहमदले ४ ओभरमा ७७ रन खर्चेर २ विकेट लिए । मोहम्मद नवाजले एक विकेट लिए ।

खेलको प्लेयर अफ द म्याच भने अब्बास अफ्रिदी चुनिए । मुल्तानका तीव्र गतिका बलर अब्बास अफ्रिदीले ह्याट्रिकसहित ४ ओभरमा ४७ रन खर्चेर ५ विकेट लिएका थिए । अब्बास अफ्रिदीले १७ औं ओभरको पाँचौं बलमा मोहम्मद नवाज, छैटौं बलमा उमिद आसिफ र १९ औं ओभरको पहिलो बलमा उमर अकमलाई आउट गर्दै ह्याट्रिक पूरा गरेका थिए ।

रावलपिंडीको पिच ब्याटिङ सहयोगी मानिन्छ । २ सय ४० रन पनि सुरक्षित देखिदैन । यसअघिको खेलमा शुक्रबार मुल्तान सुल्तानले पेशावार जाल्मीले दिएको २ सय ४३ रनको लक्ष्य पूरा गरेको थियो । २५ औं खेलमा जाल्मीले दिएको २ सय ४१ रनको लक्ष्य क्वेटा ग्ल्याडियटर्सले पूरा गरेको थियो । फ्याँट पिचमा लगातार रन बन्दै आएको छ ।