भुपेन्द्र जिसी, काठमाडौं

आइसिसी विश्वकप लिग–२ त्रिकोणात्मक ओडिआई सिरिजमा नेपाल र पपुवा न्युगिनीको खेलपछि टियु क्रिकेट मैदानमा वर्षा सुरु भएको छ । नेपालले टस जितेर पहिलो फिल्डीङ रोज्दै चाँडै खेल सक्दा सिधै विश्वकप छनोट खेल्ने आशा जीवित रहेको हो । यदि पहिलो इनिङ पूरै ५० ओभर चलेको भए नेपाल वर्षाका कारण अंक बाँड्न बाध्य हुने सम्भावना थियो । अंक बाँडेको अवस्थामा नेपाल लिग-२ को शीर्ष ३ मा पर्ने सम्भावना पनि समाप्त हुने थियो ।

पपुवा न्युगिनीलाई ९ विकेटले हराउँदै खेल सकाएको थियो । जितको लागि ९६ रनको सामान्य विजयी लक्ष्य पछ्याएको नेपालले ७.४ ओभरमा १ विकेट गुमाउँदै पूरा गरेको थियो । नेपालको जितमा आसिफ शेख २१ बलमा ८ चौका र ३ छक्कासहित ५३ रनमा नटआउट रहे । टियु क्रिकेट मैदानमा टस हारेर पहिला ब्याटिङको निम्तो पाएको पपुवा न्युगिनी ३२ ओभरमा ९५ रनमा अल आउट भएको थियो । नेपालका सन्दीप लामिछानेले १० ओभरमा १ मेडनसहित २५ रन खर्चेर ५ विकेट लिएका थिए ।

यो जितसँगै नेपाल ३५ खेलमा १८ मा जित र १५ मा हारसहित ३८ अंकका साथ चौथो स्थानमा छ । खेल सकिएको दुइ घण्टा नबित्दै टियुमा मेघ गर्जनसहित वर्षा भएको छ । वर्षा भएपछि मैदानको पिच र आउटफिल्ड अहिले पालले छोपिएर राखिएको छ । नेपाली टोली खेल सकिएपछि मैदानमै प्रशिक्षण गरिरहेको थियो । तर वर्षासँगै टोलीको प्रशिक्षण पनि अवरुद्ध भएको छ । तर समग्रमा नेपालले टस जितेर लक्ष्य पछ्याउने निर्णय थप फलदायी सावित भएको छ ।

खेल चाँडै नसकिएको भए आज नियमित ५० ओभर खेल भएको अवस्थामा वर्षाको कारण खेल प्रभावित हुने थियो । भारी वर्षा भएकाले पुन: खेल हुन नसक्दा भने नेपालले सोझै विश्वकप छनोट खेल्ने अवसर गुमाउथ्यो । आजको खेल यदि अंक बाँड्नु परेको भए नेपाल अन्तिम खेलमा विजयी भएपनि ३९ अंक हुने थियो । नेपाल र नामिबियाको समान ३९ अंक हुने थियो । यो अवस्थामा जित प्रतिशतको आधारमा नामिबियाले सोझै विश्वकप छनोटमा स्थान बनाउथ्यो ।

जित प्रतिशत समान हुँदापनि नेपालसँग राम्रो हेड टु हेड नतिजा रहेकाले नामिबिया अंक तालिकामा अघि रहँदै सोझै विश्वकप छनोटमा पुग्ने थियो । लिग–२ मा नेपालले ६ मध्य नामिबियालाई २ खेलमा हराउँदा ४ खेलमा पराजित भएको थियो ।