काठमाडौं (हाम्रो खेलकुद) – नेपालले आइसिसी विश्वकप लिग–२ त्रिकोणात्मक ओडिआई सिरिजमा पपुवा न्युगिनीविरुद्ध एक बलमा १६ रन जोडेको छ । नेपालले सोमबार पपुवा न्युगिनीलाई ९ विकेटले हरायो । जितको लागि ९६ रनको सामान्य विजयी लक्ष्य पछ्याएको नेपालले ७.४ ओभरमा १ विकेट गुमाउँदै पूरा गर्यो ।

नेपालको जितमा आसिफ शेख २१ बलमा ८ चौका र ३ छक्कासहित ५३ रनमा अविजित रहे । कुशल भुर्तेल १४ बलमा ४ चौका र २ छक्कासहित ३३ रनमा आउट भए । कुशल मल्ल १३ बलमा १ चौका र १ छक्कासहित १२ रनमा अविजित रहे । नेपालले दोस्रो ओभरका २६ रन बटुलेको थियो ।

खेलकै क्रममा नेपालले एक समय १ बलमा १६ रन बनाएको थियो । चोभार एण्डबाट आएका तीव्र गतिका बलर चाड सोपरले सुरुवाती पाँच बलमा दुई चौकासहित १० रन खर्चिएका थिए । अन्तिम बलमा उनले चौका खर्चिए । उक्त बल फ्रन्ट फुट नो बल भएको थियो । लगत्तै फ्रि हिटको अर्को फुल टस बल कम्मरमाथि उचाईका कारण नो बल हुन पुग्यो ।

दुवै नो बलमा कुशलले चौका हानेका थिए । दोस्रो फ्रि हिट बलमा कुशलले छक्का हानेपछि नेपालले उक्त बलमा कुल १६ रन जोडेको थियो । अर्थात दोस्रो ओभरको अन्तिम बलमा नेपालले दुई नो बलमा दुई चौका र एक छक्कासहित कुल १६ रन जोडेको थियो ।

ओडिआईमा एक बलमा सर्वाधिक धेरै रन भने अष्ट्रेलियाको नाममा छ । अष्ट्रेलियाले २००६ मा दक्षिण अफ्रिकाबीच एकै बलमा कुल २१ रन जोडेको थियो । रोजर टेलिमाचसले गरेको ४८ औं ओभरको पहिलो बलमा पहिलो नो बलमा चौका, त्यसपछि नो बलमा दुई रन, त्यसपछिको नो बलमा चौका, त्यसपछिको नो बलमा छक्का हान्दै कुल १९ रन जोडेका थिए ।

लगातार चार नो बलसँगै उनले दुई रन खर्चेपछि एक बलमा २१ रन खर्चिएका थिए । त्यो समय रिंकी पोन्टिङ र एन्ड्रयू साइमण्ड्सले मिलेर कुल २१ रन जोडेका थिए ।