काठमाडौं (हाम्रो खेलकुद) – नेपाली क्रिकेट टोलीका पूर्व कप्तान पारस खड्का सम्मिलित एसिया लायन्सले लेजेन्ड्स क्रिकेट लिगमा वर्ल्ड जायन्ट्सलाई १ सय बलियो लक्ष्य दिएको छ ।

दोहामा टस हारेर पहिला ब्याटिङको निम्तो पाएको एसियाले निर्धारित १० ओभरमा ३ विकेट गुमाउँदै ९९ रन बनायो । लायन्सका मिस्बाह उल हक १९ बलमा ४ चौका र ३ छक्कासहित ४४ रनमा अविजित रहे ।

तिलकरत्ने दिलशान २४ बलमा ३ चौका र १ छक्कासहित ३२ रनमा अविजित रहे । चौथो विकेटका लागि मिस्बाह र दिलशानले ६० रनको साझेदारी गरेका थिए । नेपालका पूर्व कप्तान पारस खड्का टोलीको प्लेइङ ११ मा परेपनि ब्याटिङ गर्ने अवसर भने पाएनन् ।

ओपनर उपुल थरंगा एक रनमा रिकार्डो पावेलको बलमा बोल्ड भए । थिसेरा परेरा १० र शाहिद अफ्रिदी २ रनमा आउट भए । अफ्रिदी क्रिस गेलको बलमा ठूलो सट खेल्ने धुनमा केभिन ओ ब्रायनबाट क्याच आउट भए ।

भिजेको आउट फिल्डको कारण निर्धारित समय भन्दा झण्डै तीन घण्टापछि खेल सुरु भएपछि १०.१० ओभरमा खेल झारिएको थियो । एसिया लायन्सले पहिलो खेलमा इन्डिया महाराजसलाई ९ रनले हराएको थियो । जायन्ट्सले इन्डियालाई २ रनले हराएको थियो । पारसले पहिलो खेलमा भारतविरुद्ध २ बलमा ३ रन बनाएका थिए ।