काठमाडौं (हाम्रो खेलकुद) – पपुवा न्युगिनीका कप्तान असद भालाले आइसिसी विश्वकप लिग २ त्रिकोणात्मक ओडिआई सिरिजमा युएईविरुद्ध अर्धशतक प्रहार गरेका छन् । टियु क्रिकेट मैदानमा टस हारेर पहिला थालेको पपुवा न्युगिनीले ३५ ओभरमा ४ विकेट गुमाउँदै १ सय २२ रन बनाएको छ ।

पपुवा न्युगिनीका कप्तान असद भाला ७४ बलमा ५ चौका र १ छक्कासहित ५२ रनमा क्रिजमा छन् । भालाले ७१ बलमा आफ्नो ओडिआई करिअरको १० औं अर्धशतक प्रहार गरेका छन् ।

ओपनर हिरि हिरि तीव्र गतिका बलर हजरत बिलालको बलमा ४ रनमा मोहम्मद वासिमबाट क्याच आउट भए । रोहन मुस्तफाले ओपनर किप्लिङ डोरिगालाई २४ रनमा बोल्ड गरे ।

उनले ६० बलमा ३ चौका प्रहार गरे । हजरत बिलालको बलमा सेसे बाउ ९ रनमा क्याच आउट भए । चाल्स अमिनी बिलालकै बलमा एज लागेर २२ रनमा विकेटकिपर वृत्य अरविन्दबाट क्याच आउट भए । उनले ३ चौका प्रहार गरे ।

युएईले आजको खेलमा टोलीमा दुई परिवर्तन गरेको छ । जुनैद सिद्दिक र कार्तिक मयाप्पनलाई विश्राम दिएको छ । हजरत बिलाल र सिपी रिजवानलाई मैदान उतारेको छ । पिएनजीले सेमो कमिया र हिला भारेलाई बेन्चमा राखेको छ । जोन कारिको र गौडी टोकालाई मौका दिएको छ ।

युएई र पपुवा न्युगिनी दुवैले सोझै ओडिआई मान्यता अवसर गुमाई सकेको हुँदा खेल प्रतिष्ठाको लडाईं मात्रै हुनेछ । युएई लिग–२ मा छैटौं र पपुवा न्युगिनी पुछारमा अन्त्य गर्नेछन् । यसै महिना नामिबियामा हुने प्लेअफ क्वालिफायरमा क्यानडा र जर्सीलाई पछि पार्न सके यी दुई टोलीले ओडिआई मान्यता प्राप्त गर्नेछन् ।

अन्यथा आगमी चार वर्षको लागि ओडिआई मान्यता गुमाउनेछन् । युएई ३४ खेलमा १४ मा जित र १७ मा हारसहित ३१ अंकका साथ छैटौं स्थानमा छ । पिएनजी ३५ खेलमा ५ मा जित र २९ मा हारसहित ११ अंकका साथ पुछारमा छ ।