काठमाडौं (हाम्रो खेलकुद) – युएईका कप्तान मोहम्मद वासिमले आइसिसी विश्वकप लिग-२ अन्तर्गत पपुवा न्युगिनीले प्रस्तुत गरेको प्रतिस्पर्धात्मक लक्ष्य पछ्याउनेक्रममा आक्रामक अर्धशतक प्रहार गरेका छन् ।

वासिमले २९ बलमा २ चौका र ६ छक्कासहित ओडिआई करिअरको तेस्रो अर्धशतक पूरा गरेका हुन् । जितको लागि २ सय ३५ रनको विजयी लक्ष्य पछ्याएको युएईले १३ ओभरमा १ विकेट गुमाउँदै ९४ रन बनाएको छ ।

मोहम्मद वासिम ४३ बलमा २ चौका र १० छक्कासहित ७७ रनमा क्रिजमा छन् । वासिमले १३ औं ओभरमा चाल्स अमिनीलाई पहिलो, तेस्रो, चौथो र पाँचौं बलमा छक्का हानेका थिए ।

विष्फोटक ब्याटिङ गर्दै सहज जिततर्फ अघि बढाएका छन् । वृत्य अरविन्द २२ बलमा २ चौकासहित १० रनमा खेलेका छन् । अ‍ोपनर आर्यन लाक्रा भने ४ रनमा आउट भएका थिए ।

त्यसअघि टयु क्रिकेट मैदानमा टस जितेर पहिला ब्याटिङ रोजेको पपुवा न्युगिनीले निर्धारित ५० ओभरमा ७ विकेट गुमाउँदै २ सय ३४ रन बनाएको थियो । नर्मन भानुवा ३१ बलमा १ चौका र ५ छक्कासहित ४९ रनमा अविजित रहे । हेकुरे २२ बलमा ३ चौका र २ छक्कासहित ३३ रनमा रन आउट भए ।

नर्मन भानुवाले ४८ औं ओभरको तेस्रो, चौथो र पाँचौं बलमा जावर फरिदलाई लगातार तीन छक्का हानेका थिए । अन्तिम १६ बलमा पपुवा न्युगिनीले ५ छक्का र ३ चौकासहित ४६ रन बटुलेपछि प्रतिस्पर्धात्मक लक्ष्य दिएको हो ।

पपुवा न्युगिनीका असद भाला ९२ बलमा ६ चौका र १ छक्कासहित सर्वाधिक ६५ रन बनाए । युएईका तीव्र गतिका बलर हजरत बिलालले १० ओभरमा ४७ रन खर्चेर सर्वाधिक ४ विकेट लिए । रोहन मुस्तफा र जवार फरिदले एक एक विकेट लिए ।