काठमाडौं (हाम्रो खेलकुद) – नेपालका स्पिन अलराउन्डर दीपेन्द्रसिंह ऐरीले आइसिसी विश्वकप लिग २ त्रिकोणात्मक ओडिआई सिरिजमा रोहन मुस्तफाको विकेट लिएका छन् । टियु क्रिकेट मैदानमा टस जितेर पहिला ब्याटिङ रोजेको युएईले ३८ ओभरमा ५ विकेट गुमाउँदै १ सय ७६ रन बनाएको छ ।

२० वर्षीय वृत्य १ सय ५ बलमा ६ चौका र १ छक्कासहित ६५ रनमा अविजित छन् । उनको ओडिआई करिअरको यो पाँचौं अर्धशतक हो । रोहन मुस्तफा दीपेन्द्रको ३८ औं ओभरको तेस्रो बलमा २० रनमा एलबीडब्लू आउट भए । नेपालका तीव्र गतिका बलर सोमपाल कामीले नवौं ओभरको चौथो बलमा वृत्य अरविन्दलाई ८ रनमा कट एण्ड बोल्ड गर्नबाट चुकेका थिए ।

दोस्रो विकेटका लागि कप्तान मोहम्मद वासिम र वृत्यले ७९ रनको साझेदारी गरेका थिए । स्पिनर ललितनारायण राजवंशीले तेस्रो ओभरको पाँचौं बलमा ओपनर आर्यन लाक्रालाई ६ रनमा एलबीडब्लू आउट गर्दै नेपाललाई पहिलो सफलता दिलाएका थिए ।

स्पिनर सन्दीप लामिछानेले १७ औं ओभरको दोस्रो बलमा वासिमलाई ६३ रनमा एलबीडब्लू आउट गरे । वासिमले ४९ बलमा २ चौका र ६ छक्का प्रहार गरे । अघिल्लो दिन पपुवा न्युगिनीविरुद्ध १२ छक्का हान्दै १ सय १९ रनको शतकीय इनिङ खेलेका वासिमले नेपालविरुद्ध महत्वपूर्ण अर्धशतक प्रहार गर्दै आउट भए ।

२३ औं ओभरको अन्तिम बलमा सिपी रिजवान आफ्नै गल्तीको कारण ७ रनमा रन आउट भए । दीपेन्द्रको २७ औं ओभरको पहिलो बलमा ठूलो सट खेलेका आयन खान चोभार एण्डको लङअनमा गुलशन झाबाट क्याच आउट भए ।
दीपेन्द्रसिंह ऐरीले रोहन मुस्तफालाई २० रनमा एलबीडब्लू आउट गरे । मुस्तफाले ३२ बलमा ३ चौका प्रहार गरे ।