एजेन्सी – हङकङले त्रिकोणात्मक एकदिवसीय अभ्यास खेलको फाइनलमा कुवेतमाथि पाँच रनको रोमान्चक जित हात पार्दै उपाधि जितेको छ । जितको लागि २ सय ६९ रनको विजयी लक्ष्य पछ्याएको कुवेत ४७.५ ओभरमा २ सय ६३ रनमा अल आउट भयो ।

कुवेतका युवा ब्याटर मिट भावसारले ८० बलमा ३ चौका र २ छक्काहित सर्वाधिक ५९ रन बनाए । सैद मोनिबले २७ बलमा ५ चौका र २ छक्कासहित ४० रन जोडे । बिलाल ताहिरले २९ बलमा २ चौका र २ छक्कासहित ३० रन बनाए । कुवेतलाई अन्तिम ४ ओभरमा जितको लागि २१ रन चाहिँदा हातमा दुई विकेट थियो ।

४७ औं ओभरमा आयुश शुक्लालाई शाहरुख कुद्दुसले दुई छक्का हानेपछि २० बलमा ८ रन चाहिँएको थियो । पाँचौं बलमा शाहरुख क्याच आउट भए । ४८ औं ओभरको पाँचौं बलमा इहसान खानले यासिन पटेललाई बोल्ड गर्दै रोमान्चक जित दिलाए ।
हङकङका एहसान खानले ९.५ ओभरमा ३९ रन खर्चेर सर्वाधिक ४ विकेट लिए । किन्चित शाह र हरुन अर्शदले दुई दुई विकेट लिए ।

त्यसअघि घरेलु टोली हङकङ टस हारेर पहिला ब्याटिङ गर्दै ४९.४ ओभरमा २ सय ६८ रनमा अल आउट भयो । हङकङका बाबर हायतले ७५ बलमा ४ चौका र २ छक्कासहित ६२ रन बनाए ।

अंशुमन रथले ८७ बलमा ४ चौका र २ छक्कासहित ६५ रन बनाए । जिशान अलीले ४४ र कप्तान निजाकत खान १२ रनमा आउट भए । कुवेतका शिराज खानले ७.४ ओभरमा ४२ रन खर्चेर सर्वाधिक ४ विकेट लिए । मोहम्मद शफिक र यासिन पटेलले दुई दुई विकेट लिए ।

अंशुमन रथ सिरिजका सर्वोत्कृष्ट खेलाडी चुनिए । अंशुमनले कुवेतसँग पहिलो खेलमा ६३ र मलेसियाविरुद्ध १ सय ३० रनको सानदार शतकीय इनि खेलेका थिए । अंशुमन यसअघि चार देश सम्मिलित टि२० आई सिरिजबाट हङकङको टोलीमा फर्किएका हुन् । हङकङका पूर्व कप्तान अंशुमनले भारतबाट खेल्ने सपनाका साथ २०१९ मा हङकङ छाडेका थिए । तर त्यहाँ घरेलु क्रिकेटमा राम्रो गर्न नसकेपछि पुन हङकङ फर्किएका छन् ।

अंशुमन रथको पुनरागमन बारे सम्पूर्ण जानकारी यहाँ पढ्नुहोस् : भारतमा खेल्न नसकेपछि हङकङमै फर्किए अंशुमन रथ