*यस लेखमा विश्व प्रसिद्ध क्रिकेट पोर्टल क्रिकबजको भनाइ उदृत गरिएको भएपनि यसबारे अध्यक्ष चन्दले बिसीसीआईका जय शाहसँग मौखिक कुराकानी मात्र भएको बताएका छन् । विस्तृतमा यहाँ पढ्नुहोस ।
पुरानो सामाग्री यसप्रकार थियो :
काठमाडौं (हाम्रो खेलकुद) – नेपाल क्रिकेट संघ (क्यान) का अध्यक्ष चतुरबहादुर चन्दले नेपाललाई भारत र रणजी ट्रफी खेल्न अनुमति दिनुपर्ने बताएका छन् । आइसिसी विश्वकप लिग २ मा सानदार प्रदर्शनपछि चन्दले क्रिकेटको विश्व चर्चित अनलाइन क्रिकबजसँग कुराकानी गर्दै अन्तर्राष्ट्रिय क्रिकेट परिषद् (आइसिसी) र भारतीय क्रिकेट बोर्ड (बिसिसीआई) को ध्यानाकर्षण गराएका हुन् ।
‘मैले आइसिसी र जय भाई (बिसिसिआई सचिव तथा एसिसी अध्यक्ष जय शाह) लाई भनेको छु । स्कटल्यान्ड र आयरल्यान्डले इंग्ल्यान्डमा खेल्छन् । हाम्रो टोलीलाई भारत र रणजी ट्रफी खेल्न अनुमति दिनुपर्छ । यदि त्यस्तो भयो भने हामी चार वर्षमा टेष्ट खेल्ने राष्ट्र हुनेछौं, चन्दलेले भनेका छन् ।
‘यदि तपाईंले वरपर हेर्नुभयो भने अफगानिस्तानसहित सबै छिमेकी राष्ट्र टेस्ट मान्यता प्राप्त छन् । वास्तवमा नेपाल र अफगानिस्तानसले सँगै खेल्न सुरु गरेका थिए’, नेपाली क्रिकेट टोलीका मुख्य प्रशिक्षक मोन्टि देशाईले भने ।
प्रथम श्रेणीको रणजी ट्रफी भारतको सबैभन्दा ठूलो घरेलु क्रिकेट प्रतियोगिता हो । ३८ टोलीले प्रतिस्पर्धा गर्ने रणजी ट्रफी खेल्ने खेलाडीको एक दिनको म्याच फि ६० हजार भारु हुन्छ । प्लेइङ ११ मा नरहेका खेलाडीले ३० हजार भारु म्याच फि पाउँछन् । यसै प्रदर्शनको आधारमा भारतीय टेस्ट टोलीमा बोलाइने गरिन्छ । रणजी ट्रफी विश्व क्रिकेटकै सर्वाधिक लोकप्रिय घरेलु प्रथम श्रेणीमा पर्दछ । भारतका एक दुई प्रमुख खेलाडी बाहेक अन्य सबैले रणजी खेल्ने गर्दछन् ।
भारतमा त्यस्तै टि२० राष्ट्रिय प्रतियोगिताको रुपमा सैद मुश्ताक अली र एकदिवसीय राष्ट्रिय प्रतियोगिताको रुपमा विजय हजारे ट्रफी हुने गर्दछ । यी दुई प्रतियोगिताको प्रदर्शनको आधारमा भारतीय टोली र आइपिएलमा खेलाडीले स्थान बनाउँछन् ।
मोन्टिको मुख्य प्रशिक्षकमा नेपालले १२ मध्य ११ खेल जित्दै आइसिसी विश्वकप लिग २ मा शीर्ष तीनमा रहँदै सोझै विश्वकप छनोटमा स्थान बनाएको छ ।
त्यस्तै आगमी चार वर्षको लागि ओडिआई मान्यता जोेगाएको छ । मोन्टिको प्रशिक्षकमा फेरिएको नेपाली क्रिकेटले सानदार प्रदर्शन गरेको थियो । विशेषत कमजोर मानिएको ब्याटिङमा दमदार प्रदर्शन गरेको थियो ।
आगामी जुन जुलाईमा जिम्बावेमा हुने विश्वकप छनोटमा १० टोलीको सहभागीता हुनेछ । समूह चरणबाट सुपर सिक्स हुँदै शीर्ष दुईमा पर्न सके अक्टोबर नोभेम्बरमा भारतमा हुने एकदिवसीय विश्वकप खेल्न पाउनेछ । अप्रिल तेस्रो साता देखि घरेलु मैदान टियु र मुलपानीमा एसिसी प्रिमियर कप हुनेछ । उपाधि जित्न सके नेपालले एसिया कपमा भारत र पाकिस्तानसँग खेल्न पाउनेछ ।
*मोन्टि देशाई र चतुरबहादुर चन्दसँग हाम्रो खेलकुदले कुराकानी गर्दा उक्त भनाई चन्दले मौखिक रुपमा मात्र गरेको बुझिएको छ। यसअघि अन्यथा पर्न गएकोमा हामी क्षमाप्रार्थी छौं ।
