काठमाडौं (हाम्रो खेलकुद) – मध्यक्रमकी ब्याटर सम्झना खड्काको उत्कृष्ट ब्याटिङमा सुदूरपश्चिम प्रदेशले तेस्रो संस्करणको ललितपुर मेयर्स वुमन्स च्याम्पियनसिप टि२० प्रतियोगितामा ललितपुर मेयर्स-११ लाई १ सय ३८ रनको बलियो लक्ष्य दिएको छ ।
टियु क्रिकेट मैदानमा टस जितेर पहिला ब्याटिङको थालेको सुदूरले निर्धारित २० ओभरमा ३ विकेट गुमाउँदै १ सय ३७ रन बनायो । सुदूरकी सम्झना खड्काले ४५ बलमा ६ चौकासहित सर्वाधिक ५१ रन बनाइन् । उनले ४४ बलमा यस सिजनको ललितपुरमा अर्धशतक प्रहार गर्ने पहिलो ब्याटर बनिन् । आक्रामक ब्याटर कविता जोशी २८ बलमा २ चौका र १ छक्कासहित २७ रनमा अविजित रहिन् ।
चौथो विकेटका लागि कविता र सम्झनाले ६७ रनको अविजित साभेदारी गरेका थिए । तीव्र गतिकी बलर सोनी पाख्रिनले चौथो ओभरको पाँचौं बलमा ओपनर विन्दु रावललाई १८ रनमा बोल्ड आउट गरिन् ।
कप्तान विन्दुले १४ बलमा ४ चौका प्रहार गरिन् । कृतिका मरासिनीले १२ औं ओभरको पहिलो बलमा रुबि पोदारलाई २८ रनमा क्याच गराइन् । उनले ३३ बलमा ४ चौका प्रहार गरिन् । रेवति धामी शून्यमा कृतिकाको बलमा एलबीडब्लू आउट भइन् ।
ललितपुरकी कृतिका मरासिनीले ४ ओभरमा १ मेडनसहित २४ रन खर्चेर २ विकेट लिइन् । सोनी पाख्रिनले ४ ओभरमा २८ रन खर्चेर १ विकेट लिइन् । कप्तान अस्मिना कर्माचार्यले ३ ओभरमा २० रन खर्चिन् । प्रतियोगितामा ५ टोली छन् ।
प्रधामन्त्री कपका चार सेमिफाइनल टोली कोशी प्रदेश, सुदूरपश्चिम प्रदेश, नेपाल एपिएफ क्लब र मधेश प्रदेशसँगै ललितपुर ११ छन् । ललितपुर ११ बाट प्रधानमन्त्री कपमा सेमिफाइनलमा नपुगेका प्रदेशका टोलीबाट टिम निर्माण गरिएको छ ।
