एजेन्सी – घरेलु टोली बंगलादेशले तेस्रो तथा अन्तिम ओडिआई खेलमा आयरल्यान्डमाथि १० विकेटको ऐतिहासिक जित हात पारेको छ । तीन खेलको सिरिज बंगलादेशले २-० ले जितेको हो ।

जितको लागि १ सय २ रनको सामान्य विजयी लक्ष्य पछ्याएको बंगलादेशले १३.१ ओभरमा कुनै विकेट नगुमाई पूरा गर्यो । यो बंगलादेशले टेस्ट, टि२० आई र ओडिआई कुनैपनि अन्तर्राष्ट्रिय खेलमा १० विकेटको जित हात पारेको पहिलो पटक हो ।

यस अघि ओडिआई र टि२० आईमा ९-९ विकेटको जित थियो । टेस्टमा ८ विकेटको जित थियो । आयरल्यान्डमाथि बंगलादेशले आफ्नो क्रिकेट इतिहासकै ऐतिहासिक जित हात पारेको हो ।

बंगलादेशको जितमा लिटन दास ३८ बलमा १० चौकासहित ५० रनमा अविजित रहे । कप्तान तमिम इकबाल ४१ बलमा ५ चौका र २ छक्कासहित ४१ रनमा अविजित रहे ।

त्यसअघि टस जितेर पहिला ब्याटिङ रोजेको आयरल्यान्ड २८.१ ओभरमा १ सय १ रनमा अल आउट भएको थियो । आयरल्यान्डका कर्टिस क्याम्फरले ४८ बलमा ४ चौकासहित सर्वाधिक ३६ रन बनाए । लोर्कान टकरले ३१ बलमा ४ चौकासहित २८ रन बनाए । लज्जास्पद ब्याटिङ गर्नेक्रममा आयरल्यान्डका ९ खेलाडीले दोहोरो अंकमा रन बनाउन सकेनन् ।

बंगलादेशका तीव्र गतिका बलर हसन मोहम्मदले ८.१ ओभरमा १ मेडनसहित ३२ रन खर्चेर सर्वाधिक ५ विकेट लिए । तस्किन अहमदले १० ओभरमा १ मेडनसहित २६ रन खर्चेर ३ विकेट लिए । एबादोत हसनले दुई विकेट लिए ।

पहिलो खेलमा बंगलादेश १ सय ८३ रनले विजयी हुँदा दोस्रो खेल बर्षाको कारण रद्ध भएको थियो । बंगलादेश र आयरल्यान्डबीच अव तीन टि२० आई र एक टेस्ट खेल हुनेछ । पहिलो टि२० आई खेल २७ मार्च, दोस्रो खेल २९ मार्च र तेस्रो खेल ३१ मार्चमा हुनेछ । एकमात्रै टेस्ट खेल ४ अप्रिलदेखि सुरुहुनेछ ।