एजेन्सी – तीव्र गतिकी बलर इस्सी वोंगको ऐतिहासिक ह्याट्रिकमा मुम्बई इन्डियन्सले पहिलो संस्करणको वुमन्स प्रिमियर लिगको एलिमिनेटर खेलमा युपी वारियर्सलाई ७२ रनले हराउँदै फाइनलमा पुगेको छ । योसँगै उपाधिको लागि मुम्बईले दिल्ली क्यापिटल्ससँग प्रतिस्पर्धा गर्नेछ ।

जितको लागि १ सय ८३ रनको विशाल विजयी लक्ष्य पछ्याएको युपी १७.४ ओभरमा १ सय १० रनमा अल आउट भयो । युपीकी किरण नवगिरेले २७ बलमा ४ चौका र ३ छक्कासहित सर्वाधिक ४३ रन बनाइन् । अन्य कुनैपनि ब्याटरले राम्रो प्रदर्शन गर्न सकेनन् ।

वाेंगले १३ औं ओभरमा डब्लूपिएल इतिहासकै पहिलो ह्याट्रिक लिने खेलाडीको कीर्तिमान कायम गरेकी छिन् । वोंगले १३ औं ओभरको दोस्रो बलमा किरणलाई डिप मिडविकेटमा ब्रन्टबाट क्याच गराएकी थिइन् ।

तेस्रो बलमा स्रिमन शैखलाई बोल्ड गरिन् । चौथो बलमा सोफी एक्लेस्टोनलाई बोल्डै गर्दै डब्लूपिएलमा ह्याट्रिक लिने पहिलो खेलाडी बनेकी थिइन् । मुम्बईकी इस्सी वोंगले ४ ओभरमा १५ रन खर्चेर ४ विकेट लिइन् । सिका इशाकले दुई विकेट लिइन् ।

त्यसअघि डिआई पाटिल स्पोर्ट्स एकेडेमीमा टस हारेर पहिला ब्याटिङको निम्तो पाएको मुम्बईले निर्धारित २० ओभरमा ४ विकेट गुमाउँदै १ सय ८२ रन बनाएको थियो । मुम्बईको जितमा नाट स्काभर ब्रन्टले ३८ बलमा ९ चौका र २ छक्कासहित सर्वाधिक ७२ रनमा अविजित रहिन् । पुजा ४ बलमा १ चौका र १ छक्कासहित ११ रनमा अविजित रहिन् ।

ओपनर यस्तिका भाटिया २१, हेली म्याथ्युज २६ र कप्तान हरमनप्रीत कौर १४ र अमेलिया केर १९ बलमा ५ चौकासहित २९ रनमा आउट भइन् । युपीकी सोफी एक्लेसटोनले ४ ओभरमा ३९ रन खर्चेर २ विकेट लिइन् । दिल्ली शीर्ष स्थानमा रहँदै सोझै फाइनलमा पुगेको थियो । फाइनल आइतबार हुनेछ ।