एजेन्सी – कप्तान रोभम्यान पावेलको उत्कृष्ट ब्याटिङमा वेस्टइन्डिजले पहिलो टि२० आई खेलमा घरेलु टोली दक्षिण अफ्रिकामाथि तीन विकेटको सानदार जित हात पारेको छ । योसँगै तीन टि२० आई खेलको सिरिजमा वेस्टइन्डिजले १(० को अग्रता लिएकोछ ।

जितको लागि १ सय ३२ रनको बलियो विजयी लक्ष्य पछ्याएको वेस्टइन्डिजले १०.३ ओभरमा ७ विकेट गुमाउँदै पूरा गर्यो । वर्षाको कारण खेल ढिलो सुरु हुँदा ११-११ ओभरमा झारिएको थियो । कप्तान रोभम्यान पावेल १८ बलमा १ चौका र५ छक्कासहित ४३ रनमा अविजित रहे ।

ओपनर ब्रेन्डन किंगले ८ बलमा २ चौका र २ छक्कासहित २३ रनको आक्रामक सुरुवात दिलाएका थिए । उनी सिसान्डा मगलाको बलमा बोल्ड भए । ओपनर काइल मेयर्स ६ रनमै आउट भएका थिए । जोनसन चाल्र्स १४ बलमा १ चौका र ३ छक्कासहित २८ रनमा आउट भए ।

निकोलस पुरन ७ बलमा ३ चौकासहित १६ रनमा आउट भएका थिए । दक्षिण अफ्रिकाका सिसान्डा मगलाले २ ओभरमा २१ रन खर्चेर ३ विकेट लिएपनि टोलीको हार टार्न सकेनन् । तबरेज शम्सी र एनरिच नोर्कियाले एक एक विकेट लिए ।

त्यसअघि सुपर स्पोर्ट्स पार्क सेन्चुरियनमा टस हारेर पहिला ब्याटिङको निम्तो पाएको दक्षिण अफ्रिकाले निर्धारित ११ ओभरमा ८ विकेट गुमाउँदै १ सय ३१ रन बनाएको थियो । दक्षिण अफ्रिकाका डेविड मिलर २२ बलमा ४ चौका र ३ छक्कासहित सर्वाधिक ४८ रनमा आउट भए ।

सिसान्डा मगला ५ बलमा १ चौका र २ छक्कासहित १८ रनमा अविजित रहे । ओपनर क्विन्टन डि कक रोयल डक आउट, रिजा हेन्डिक्स २१, राइली रोसोउ १० र कप्तान एडेन माक्ररम १४ रनमा आउट भए ।

वेस्टइन्डिजका शेल्डन कटरेलले ३ ओभरमा ३१ रन खर्चेर २ विकेट लिए । ओडेन स्मिथले २ ओभरमा २७ रन खर्चेर २ विकेट लिए । अकिल हुसैन, अल्जारी जोशेफ र रोमारियो शेफर्डले एक एक विकेट लिए । दोस्रो खेल आइतबार र तेस्रो खेल मंगलबार हुनेछ ।